22/12/2016

Axenda docente do 2º trimestre

Remata o trimestre que parece que pasou voando... hai un montón de recursos e ideas preparados para ser compartidos en breve mais, polo de agora,  aquí ven a axenda do segundo trimestre!

Como comentei NESTA entrada, despois de cursos nos que empreguei opcións só dixitais con Apps como as que recomendaba (iDoceo, Additio, Cuaderno del profesor, etc.) e outros nos que empregaba cuadernos docentes en formato físico este curso optei por unha opción combinada.




Para calificacións, grupos, etc. estou empregando iDoceo, pola contra emprego unha axenda física para anotacións, programación de actividades de aula...


Como para min é importante non cargar con enormes axendas que acumular traballo de todo o curso optei por facer unhas trimestrais o máis lixeiras posible.

Así que, igual que fixen ao comezo do curso aquí tedes para imprimir a miña opción do segundo trimestre, que continúa coa mesma liña do primeiro.



Esta axendiña está lista para descargar e imprimir a doble cara ou adaptar ás nosas necesidades e inclúe:
  • A portada e o estampado traseiro da mesma.
  • A folla dos datos (non vaia ser que a perdamos!)
  • O calendario escolar (segue sendo o da Coordinadora Galega de Equipos de Normalización Lingüística)
  • O espazo para os horarios
  • As follas de organización semanal con calendario trismestral e o espazo para cada día da semana (luns a venres) así como espazo para anotacións e recordatorios.
  • A portada para incluír as follas de anotacións e proxectos ao final da axenda.



Sei que moitos remataremos o segundo trimestre bastante antes da chegada das vacacións de pascua (por equilibrar a duración dos tres trimestres) pero aínda así incluín ata a metade do mes de abril para poder adaptala ás necesidades de cada centro e profe.

Para min está sendo bastante operativa e valoro moito que quede algo bastante manexable e de pouco peso xa que con esto e a App teño todo listo.

Agardo que vos sexa de utilidade, se queredes a miña opinión sobre as distintas apps de xestión docente que coñezo recoméndovos pasar pola entrada de organización do curso na que falei delas desde a miña experiencia.

Saúdos desde a fiestra!

02/12/2016

O emocionario e material para traballalo (Parte I)

Tras resistirme ao furor inicial do libro non puiden evitar mercalo en canto vin a edición en galego, así que o Emocionario de Palabras Aladas chegou ás miñas mans.

Este libro conta con 42 emocións enlazadas, explicadas e ilustradas dun xeito moi coidado e sen nunca xulgalas ou clasificalas como "boas" ou "malas".



En canto o tiven comecei a cavilar xeitos de traballar este libro xa que non é moi dado a ser un simple recurso de lectura autónoma e atopei que, na propia web da editorial teñen guías de traballo para distintas idades e fichas gratuitas (en castelán) así que xa tiña moitas ideas polas que comezar.

De xeito que este traballo non é completamente meu, eu visitei ese material, collín o que pensaba que viña mellor ao meu grupo, transformei algunhas actividades escritas en orais, modifiquei, adaptei e elaborei as fichas das emocións en galego adaptadas ao meu grupo de 1º e 2º.

Aquí tedes as das 10 primeiras emocións por si vos son de utilidade para empregar ou como inspiración. Eu intento traballar, polo menos, dúas emocións distintas á semana co grupo e os resultados son moi satisfactorios, descubrimos un montón de cousas!

Agora que vai rematando o trimestre faremos recopilación das que levamos vistas e prepararemos un emocionario fotográfico - musical (solicitando unha axudiña ás familias, aínda que rapaces de niveis máis altos poderán facelo autónomamente).


A verdade é que o libro sorprendeume para ben, é moi recomendable desde infantil ata os cursos do final da primaria e incluso na secundaria só con mudar a forma de traballalo.

Ademáis hai moitas e moi interesantes cousas que podemos traballar de multitude de formas arredor das emocións; como cando fixemos iSinto as nosas Apps con sentimentos, podedes ver este proxectiño nesta entrada.


E vos? Tamén botáchedes un ollo ao archicoñecido Emocionario? E que tal?

Saúdos desde a fiestra!


07/11/2016

Facemos radio!

Comeza novembro e embarcamos nunha nova idea, unha tarefa coa que estamos moi emocionados/as, imos idear e crear un programa de radio!

(Podes facer clic na imaxe para acceder á web)

Comezamos reflexionando sobre o que xa sabemos e o que pretendemos aprender. Que saben os rapaces/as da radio? Cando a escoitan?

Desde este punto iremos pasiño a pasiño ata crear o noso primeiro programa e como guia temos a nosa web do proxecto, así podemos ir superando fases pouco a pouco porque isto non se fai nun día!

Creei este pequeno proxecto pensando no alumnado de 1º e 2º así que... todos poden! Sairannos programas máis sinxelos ou complexos, con máis profundidade nos temas ou menos, tratando áreas moi diversas ou máis acotadas e con máis ou menos intervención nosa pero o que é seguro é que poderemos desenrolar a tarefa en calquera nivel.

Tras manifestar as nosas ideas e coñecementos previos introducimos o tema escoitando un programa real, neste caso é un de "La estación azul de los niños" que é un programa familiar que se emite semanalmente de moi boa calidade (Se coñecedes algún outro programa de radio para nenos e nenas ou familiar gustaríame moito que mo dixerades, por favor!)

Aquí facemos un alto para ver si tan só escoitando un programa xa descubrimos cousas novas.

(Podes facer clic na imaxe para acceder á web)

E comezamos o proceso creativo, seguimos os puntos marcados e imos creando os equipos, as seccións, achegando as ideas e creando a nosa escaleta do programa para acabar por reunir o material, gravar, editar, facer a nosa sintonía e, por suposto, darlle difusión ao noso proxecto agardando que nos escoiten e deixando aberto o noso "muro das ideas" para que calquera poda incluír ideas para a seguinte edición do programa.


Considerando outros proxectiños deste tipo levados a cabo coma o do cinema este resulta sensiblemente máis doado de desenrolar con grupos de todo tipo e número xa que o resultado final será unha pista de audio que non precisa tanta elaboración e preparación. Ademáis nun programa de radio dividido en seccións o traballo en equipos é máis doado e tendo en conta que as seccións son curtas e amenas o grado de dificultade tamén diminúe e tamén o tempo que leva rematar toda a tarefa, invírtense menos sesións.

O certo é que con grupos de niveis máis altos o seu grado de autonomía tamén será moito maior e poderemos encargarlles moitas outras tarefas desde a investigación dun tema máis complexo, a búsqueda ou creación de efectos especiais ou incluso a edición do programa.

Agardo que vos guste e/ou inspire a idea e vos animedes a desenrolala ou comentar  outras semellantes.

Saúdos desde a fiestra.

24/10/2016

Xogos de rol no cole? "Pequeños detectives de monstruos"

Todos coñecemos famosos xogos de rol... eses xogos, que á vez son historias que imos creando mentras xogamos con nós coma protagonistas; uns son de cartas, outros videoxogos, ou con figuras e taboleiro... e despois están aqueles que se crean ou "viven" en primeira persoa. Son un alimento para a imaxinación, a creación literaria, o traballo en equipo e a diversión. Perfecto para a miña aula, pensei.

Coma por arte de maxia atopei nas redes un libro que non dubidei en mercar e certamente, foi un acerto.

O libro (que non é só un libro) chámase "Pequeños detectives de monstruos" (non o atopei en galego pero as historias desenvólvense na lingua que nós decidamos ;) ). 
Este libro, cunha coidadísima e preciosa edición, xa no inicio promete ser un elemento perfecto para achegar o mundo da creación e vivencia de historias e as aventuras de rol a nenos. A partir de 3 anos!


O libro é a guia perfecta para o "detective veterán" onde explica como preparar a nosa partida, é tan flexible que pode adaptarse a distintas idades, grupos, e formas de xogar. Incluso podemos plantexar a nosa partida ou historia cun taboleiro no canto de moverse polos espacios reais (aínda que xa sabemos o que preferirán os rapaces máis novos...)

Ensina as normas de xogo, tamén achega os modelos de "contrato coa axencia de detectives" (que au adaptei para a aula e a lingua), insignias, ferramentas para a nosa misión, e os perfís dun montón de monstros aos que podemos ter que atrapar (o dos segredos, o dos dentes sucios, do lixo...) ademáis dunha aventura de exemplo, historias, novas da axencia... buf.



Así que, ao adquirilo non puiden máis que poñerme a preparar a aventura que ían construír os nenos e nenas (neste caso de 1º e 2º de primaria).
A carta que recibirían solicitando se desexaban unirse á axencia de detectives para resolver o caso, o contrato de detectives, a ficha da misión que terían que levar a cabo, as ferramentas que poderiamos empregar, as pistas poderían atopar (ou non), as insignias que poderían recibir, comunicacións da axencia de detectives...

E paf! a nosa historia comezaba. 

Pode desenrolarse nunha soa sesión, en varias, en equipos, todos xuntos, as posibilidades son moitas e, sen dúbida as oportunidades posteriores tamén son destacables: escribir o que pasou na nosa historia coma un conto, contestar á carta que a axencia nos fai chegar se atrapamos e enviamos ao monstro, escribirlles, deixar algunhas pistas e que pensen ou inventen que tipo de monstro pode estar detrás delas, inventar personaxes...

A verdade é que o libro pareceume incríble para empregar así que si coñecedes máis deste estilo, adaptado aos rapaces, non dubidedes en contarmo. 

Ademáis agora que estamos na semana do Samaín... que mellor que crear unha historia na procura dun monstro fedello que se agocha pola escola!

Pronto publicarei os documentos desta aventura por se queredes desenrolar unha semellante ou coller ideas e se vos tedes algo semellante ou xa probastes este libro estaría ben compartir experiencias.

Agardo que vos resulte interesante e, aproveitando a data, lémbrovos que nesta outra entrada tedes uns libriños descargables para completar sobre o medo, na miña experiencia, os rapaces sempre disfrutan moito reflexionando sobre cada páxina e completándoo!

Saúdos desde a fiestra!



04/10/2016

15 propostas de expresión oral e escritura creativa!

Este curso estamos devorando propostas de escritura creativa e expresión oral a velocidade de vertixe! Así que non queda outra que ir engadindo as novas propostas!



Funcionan, motivan, son divertidas e creativas e fannos mellorar tanto a expresión oral coma a escrita de xeito moi notable, de verdade que recomendo moito que as probedes en moitos niveis porque é moi sorprendente.

Antes de nada déixovos a primeira entrada deste tipo que fixen, na que xa había 20 propostas e ideas de como usalas. Comentarvos que tamén están dando boísimos resultados empregándoas como recurso para o desenvolvemento da expresión oral, non imaxinades os argumentos tan convincentes que dan os rapaces de primeiro para nos convencer de que cada un deles merece "o último pedazo de pizza do mundo" :)

Tamén achego a ligazón á segunda remesa de propostas.
(Podedes descargalas todas!)

E aquí chegan 15 novas...




Agardo que vos gusten, se non as tedes probado vos animedes e non dubidedes en achegar comentarios e opinións!

Saúdos desde a fiestra!

26/09/2016

Creamos cinema!

Tras dúas semanas intensas co alumnado xa nas aulas preséntovos un proxecto bastante ambicioso pero moi gratificante, transversal e motivador: crear cinema nas nosas aulas de primaria. Non temas e continúa lendo!

Son innumnerables os estudos sobre como empregar o cinema nas aulas, con visionados reflexivos, buscando o contido, a crítica, a comprensión, análise de aspectos técnicos ou musicais, etc. Ademáis, a creación animada ou cinematográfica ofértanos un recurso amplio e sempre motivador co que traballar que non é tan complexo como pode parecer se o organizamos e diriximos correctamente.


Podemos comezar por pequenos proxectos de animación; un exemplo cuxo funcionamento e resultados foron moi satisfactorios na miña práctica foi empregar uns bonecos e obxectos de Playmobil e a técnica stopmotion para contar unha pequena historia, unha lenda ou representar as festas patronais do lugar onde estaba o centro. Logrei unha gran implicación no deseño da historia, a secuenciación, a aportación e creación de materiais, o desenrolo, execución... e por suposto, conseguimos esa cara de satisfación do alumnado ou visionar un proxecto rematado, totalmente elaborado por eles en equipo con todo o que conleva.

Hoxe achego o proxecto para a creación dunha curtametraxe na escola. Tendo en conta que se desenvolve nos primeiros niveis de primaria é aplicable a todos os demáis dándolles máis grado de autonomía, creando equipos de expertos, guiando menos algúns pasos ou complexizando elementos coma o guión, a creación de personaxes, etc.

Tras planificar e organizar o proceso que iamos seguir elaborei unha web que vai guiar todo o proceso e que tamén alberga os recursos imprimibles que podemos precisar de xeito que todo queda recollido e programado desde o inicio axundando ao avance paulatino e dando esa sensación de ir alcanzando pequenas metas, elemento moi importante no desenrolo dun proxecto longo para manter a motivación e o interese e que non se faga tedioso ou disperso.


A idea é comezar cunha semente inicial, coma os exemplos que se plantexan na web, pode ser relacionada con algunha temática do centro, cun tema de actualidade, cun interese do alumnado... as posibilidades neste punto son infinitas. A partir de ahí comezaremos creando a nosa personaxe ou personaxes principais nun debate inicial e buscando secundarios e antagonistas da historia. 


Para plasmar os pasos recomendase o uso dun portfolio en calquera soporte (dixital ou analóxico), para o cal se proporcionan as plantillas descargables.

       

A partir de aí seguiremos creando a nosa historia seguindo os pasos indicados na web que nos levarán, paso a paso, desde este punto ata a misma estrea da nosa propia curtametraxe.

Preparados? Anímovos encarecidamente a implementar proxectos deste tipo xa que o proceso é apaixoante tanto para o docente coma, sen dúbida, para o alumnado; desenvolvendo competencias linguísticas, sociais, artísticas... nun primeiro momento pode dar vertixe pero a miña experiencia dí que todo o que se alcanza tanto no proceso coma co resultado é  moi gratificante, significativo e edificante.

Agardo que vos sirva coma recurso ou inspiración e vos animedes a comentar as vosas impresións, ideas ou proxectos nesta fiestra!

Saúdos.

29/08/2016

Os primeiros días: Materiais e actividades

Achégase o inicio do curso e ese día no que tanto nós coma os alumnos e alumnas mostramos as nosas primeiras cartas, acollemos, creamos expectativas e chegamos e chegan cheos de ilusións e medos.

Sona o timbre e unha ringleira de nenos e nenas expectantes avanza polo corredor ata a aula onde agardamos impacientes e, en moitos casos, non os coñecemos de nada, é a primeira vez que vemos as súas caras e imos estar con eles todo o día (se somos os titores/as; veremos cada hora a un grupo expectante distinto se somos especialistas), entón, que facemos? Os anos, a experiencia e os compañeiros van conformando a nosa batería de ideas coas que dar o pistoletazo de saída ao curso escolar, todos queremos comezar e que cando soe a campá os rapaces e rapazas teñan ganas de voltar ao día seguinte.

Así que pensei en facer unha pequena recopilación de ideas para o primeiro ou primeiros días de escola cunha serie de materiais por se poden ser de ultilidade.

Gústame recibir ao alumnado con saúdos xa desde a porta e, se pode ser, que unha canción nos acompañe ao fondo. Por suposto, comezo por presentarme e pedir que se presenten para ir abrindo a excel mental de nomes e datos do alumnado (podemos pasarlles unha pelotiña e quen a reciba que diga o seu nome e algo que lle encanta, ou un adxectivo ou facer calquer clásico xogo ou rutina de presentación de campamento para comezar, dependendo do curso no que nos atopemos).

Un clásico son as enquisas de inicio de curso sobre preferencias, gustos de todo tipo, expectativas, amizades... que proporcionan moi valiosa información para comezar a traballar. O certo é que temos moitas formas de facelas pode ser nunha ficha para completar con texto ou debuxos, unha enquisa dixital nos ordenadores, nun mural de postits que completar por turnos, empregando cartaces e gomets e por suposto tamén oral. 





Recordades o clásico xogo de cruzar a liña? Cunha liña debuxada ou pegada no chan facemos preguntas de si/non ou de dúas opcións pedindo que a crucen para responder, tamén podemos facelo por recunchos e dar máis opcións e por suposto permitir que engadan aclaracións ou suxerencias de preguntas.



Outra idea é o xogo das cores: Empregando caramelos de cores (lacasitos, ou fichas dun xogo, boliñas de papel ou mesmo un dado empregando números en vez de cores) atribuímos a cada cor ou número unha premisa e pedimos que resposten segundo o que lles toque ao azar, por exemplo:


Despois temos os elementos típicos coma pedir que elaboren un cartaz co seu nome, repartir ou elaborar horarios e listas de materiais ou completar o primeiro poster decorativo da aula así coma, moi importante, elaborar as nosas normas como grupo. Está ben que fagamos parellas ou equipos pequenos e poñamos un tempo límite para pensar as súas normas e tras poñelas en común elaborar as que teremos en conta coma comunidade e plasmalas en cartaces (podemos incluír ferramentas dixitais se dispoñemos de ordenadores ou se a aula de informática está dispoñible para facer esto).

Coma primeiro poster de aula temos moitas opcións: completar un prediseñado, elaborar a nosa bandeira poñéndonos de acordo nos elementos que incluiríamos ou crear un puzzle, por exemplo, podemos dar a cada un cadrado cun arco (un cuarto de circunferencia debuxado) e pedimos que decoren dun xeito moi diferenciado o interior e o exterior da liña, despois xuntamos o traballo de todos formando círculos nun, sempre vistoso, mural común.

Dependendo da idade poderemos incluír algún conto de éxito e actividades co mesmo, se imos ter unha mascota pode ser un bo momento para presentala cunha fascinante historia e, claro, tamén algunha actividade rítmica ou con cancións, incluso algunha curtametraxe ou vídeo sobre o que traballar, clásicos que enganchan e non defraudan.

Aquí ven outra actividade que me encanta: "A torre máis alta". É tan sinxela como dividir á clase en equipos, darlles o material que consideremos e poñer unha conta atrás dos minutos que creamos convintes para deseñar e elaborar unha torre. Os equipos deberán traballar xuntos para lograr a súa meta (unha oportunidade perfecta para as nosas primeiras observacións sobre o traballo en equipo do grupo) aquí deixo un exemplo mais deberemos adaptalo aos distintos niveis por exemplo engandindo un anaco de plastilina a cada equipo e quitando o fío, ou complicalo solicitando que a estructura deberá soster un ovo...

Os vindeiros días chega o momento de presentar as distintas areas e navegar naquelo que agardan delas, as súas preferencias e tamén naquelo que recordan doutros anos facendo as nosas pesquisas e evaluacións diagnósticas para ter a referencia, o punto de partida. Sempre son útiles e divertidas a nubes de palabras.

Aquí deixo unha presentación da área de Música por se queredes tamén algunha idea.


E, por suposto, as portadas para as carpetas, ficheiros ou cadernos.
Sinto que aínda me quedan ideas que incluír neste post no tinteiro mais faise moi extenso así que pensei que xa irá crecendo, agardo que vos guste, vos sexa de utilidade e sentídevos libres de empregar todo o material que para eso está: compartir é vivir! :)

Saúdos desde a fiestra.



18/08/2016

Organizando o curso: axenda docente e apps.

A pouco de comezar un novo curso escolar pareceume boa idea traervos os materiais esenciais cos que organizo os meus días.

Xa vai uns anos que optaba por ter todo (ou case todo) dixitalizado, para o cal empregaba unha tablet, mais, a gran cantidade de grupos e alumnos/as aos que din clase o ano pasado fixéronme ter que engadir, de novo, parte de soporte en papel e, este curso, optarei por unha opción combinada, sinxela e, sobre todo, lixeira. 

A mistura da que vos falo consiste, no meu caso, en empregar as aplicacións de xestión docente da que vos falo un pouco máís abaixo para todo tipo de calificacións e rexistros do alumnado coma viña facendo e empregar unha axenda trimestral en papel que elaborei para a planificacion de distintas actividades ou proxectos de aula ou para anotar todo o que considero que debe estar máis á man ou é máis útil aí que no dispositivo.



axenda en papel que podedes descargar e imprimir é moi sixela, consta só catro elementos diferenciados:
- Unha portada.
- A folla dos datos persoais.
- Unhas plantillas para incluír os horarios que precisemos (persoais, de grupo, de aulas, biblioteca...)
- Un calendario escolar (neste caso o que teñen colgado na web da Coordinadora Galega de Equipos de Normalización Lingüística)
- As follas de planificación semanal que constituirán o groso da axenda; cun pequeno calendario na parte superior e moito espacio en cada día para completar todo o necesario en cada sesión ou periodo, etc.
- Unha portada interior de anotacións que da paso a algúns folios en branco (ou ben papel pautado ou de cores) para anotacións varias.

Incluín tamén dous separadores que se poden eliminar mais están coa fin de que se imprimimos todo o documento a doble cara quede cada páxina no seu lugar  e vexamos a semana completa ao abrir o caderno.

Esta axenda comprende desde  o inicio de Setembro ata finais de Decembro e, en Xaneiro, comezarei unha similar coa fin de que sexan funcionais e lixeiras. 
Sobre as aplicacións de xestion docente; por si vos sirve de referencia, os anos nos que traballaba só cunha tablet con sistema operativo Android probei diversas Apps como a de Additio pero sen dúbida a miña favorita naquel tempo foi "Cuaderno del Profesor" (ten versión Lite, gratuita e outra de pago) intuitiva moi, moi simple e super eficiente, mais seguro que agora hai outras moitas opcións máis completas. (Tamén empregaba ferramentas de Google para completar a dixitalización de todo o necesario, desde as reunións, programacións de aula, recordatorios...)

Agora, levo dous cursos completos nos que o que emprego é un iPad e, para o seu sistema operativo, a oferta de Apps de xestión docente é enorme. Tras probar e indagar, comecei a usar iDoceo, unha aplicación con miles de usuarios, e, sen dúbida, é a que maís me gusta e a que mellor se adapta no meu caso.



Pode resultar confusa ao principio xa que non é tan intuitiva coma os outros exemplos mais esto é o que permite que sexa moi personalizable e adaptable á situación de cada docente. Podes crear e descargar moitos tipos de plantillas para notas de toda índole, combinalas, modificalas, engadir as célebres rúbricas, etc. En definitva, é unha aplicación coa que, se lle adicas un pouco de esforzo ao comezar o curso, aforrarás moito tempo durante o resto de meses e terás todo organizado e sinxelo para xestionar; un gusto.

Ademáis, nestas aplicacións tamén temos outras moitas funcionalidades que podemos explorar: diario, apartado para todo tipo de datos do alumnado, xestión de faltas, exportación de datos a documentos ou para imprimir, planos da aula para organizar mesas ou recunchos... de xeito que cada un acabaremos por empregar aquelas que nos axudan ou facilitan máis a nosa labor concreta nos centros.

En resumidas contas, coa axenda impresa e a apliación iDoceo é como eu comezarei a organizar o novo curso escolar aída que é un aspecto que vou adaptando ás necesidades de cada ano así que engadirei novos aspectos e materiais en futuras entradas.

Agardo que cheguedes coas pilas moi cargadas e con moitas ideas para o novo curso!
Saúdos desde a fiestra!




17/06/2016

iSinto, a nosas apps con sentimentos.

Xa sei que este curso semella estar xa agonizando, mais non quixera despedilo sin vos deixar este novo recurso.

Trátase dunha tarefa tan sinxela como ampliable e adaptable, é dicir, unha ferramenta desas que se poden aproveitar en mil situacións distintas.

Neste caso a proposta chámase iSinto, e, nela, os alumnos e alumnas deseñaran a súa aplicación "con sentimentos", trátase de analizar distintos tipos de sentimentos desde a ledicia e o amor á soidade ou medo e incluir na nosa App: a nosa propia definición do sentimento, unha recomendación sobre que facer cando o sentimos, unha canción que nos inspire ese sentimento e unha imaxe, así coma, por suposto, teremos que poñer nome á aplicación e deseñar a icona (pódese facer a man ou empregando ferramentas coma Pizap, que da moito xogo neste caso).

Finalmente xuntaremos os traballos para facer un iSinto virtual no que todos poidamos entrar nas "apps" feitas polos compañeiros e enriquecelas, por exemplo engandindo outras cancións a sentimentos, etc.

Todo esto pódese desenvolver seguindo os sinxelos pasos desta web e tamén co material imprimible que inclúe:

(Fai clic na imaxe para acceder á Web do proxecto)


O mellor deste recurso é a súa sorprendente adaptabilidade: porque non crear un iGalicia no que cada equipo faga unha app, por exemplo as do himno, lingua, tradicións, provincias, gastronomía, artes, escritores...? Ou un iPintores con datos sobre cada artista, iHistoria, iSistemaSolar, iLibrosiXogosPopulares... as posibilidades son infinitas!




iSinto from Patricia Sánchez Lamas


Agardo que vos guste e vos sexa de utilidade nalgún momento!
Que teñades un bo remate de curso e saúdos desde a fiestra!

31/05/2016

A conta atrás!

Xa estamos entrando en xuño e respírase no ambiente ese aire de pre-vacacións escolares tan recoñecible... 

Por outra banda todos/as quen máis, quen menos, gústanos unha boa conta atrás, canto falta para o verán, para o aniversario, para -nonseical- excursión, para as festas da vila... e aos nenos/as tamén! Só hai que ver con canto tempo nos adiantan que van ser os seus cumples!

E diso vai o recurso que vos achego, é unha conta atrás para a fin do curso na cal cada día descubriremos unha pequena pero divertida actividade que se pode implementar nos últimos minutos da sesión correspondente.




Esta é unha imaxe interactiva, cada un dos números ten un botonciño que indica a actividade proposta, coa ligazón ao recurso descargable preciso para levalas a cabo. Se ben moitos especialistas xa non dispoñen nin de 10 sesións restantes nos grupos o recurso pode ser infinitamente adaptado con outros números, datas e, por suposto, outras ideas de actividades para as nosas contas atrás.


(Sitúa o cursos nos números para descubrir os botóns e os recursos!)


Resulta moi divertido ver como o alumnado está desexando descubrir a actividade da conta de cada día convertíndose nun peche de curso fabuloso no que podemos incluír desde xogos de repaso, competicións, bailes, actividades de exterior, reflexións, creatividade... o caso é que todo vale e, neste recurso, a maioría do protagonismo e elemento motivador é o feito de presentalo como dita conta atrás na que ir descubrindo as tarefas que se nos propoñen.

Agardo que vos sirva de idea e desfrutedes a vosa conta atrás.

Saúdos desde a fiestra!

19/05/2016

Como sonan as esculturas? Relacionando artes.

Xa fixemos algunha outra tarefa relacionando distintos tipos de manifestacións artísticas coma esta que fai unha ligazón entre fotografía e música.

Hoxe achégovos unha serie de tarefas a traves desta web coas que pretendemos que o alumnado sexa quen de reflexionar sobre como relacionar a música coa escultura creando a súa exposición no museo da aula. Son unha serie de tarefas que implican reflexión, creación e traballo en equipo, puntos forttes que deberemos ter en conta e avaliar en todo o proceso.

(Podes acceder á web se fas clic na imaxe)

A primeira tarefa é moi sinxela, nela  temos 5 imaxes de esculturas e 5 audios que os alumnos/as, de xeito individual, en equipos ou mesmo en gran grupo coma introducción, deben relacionar xustificando as súas seleccións. Se ben as músicas foron escollidas de xeito que as relacións son moi previsibles debemos ter en conta que calquera ligazón que eles/as creen estará ben se ven acompañada da súa xustificación persoal e iso será moi enriquecedor para o grupo. Tamén poden suxerir outras músicas, etc.

Nunha segunda parte a web indícanos que unha música chegou por sorpresa á nosa sala do museo sen ningunha escultura que a acompañe así que convertirémonos en "escultores/as a cegas". A actividade é tan sinxela como enriquecedora e divertida. O alumnado vendará os seus ollos e cada un/ha terá un anaco de arxila diante. Unha vez comece a música deberán escoitar con moita atención e  pensar aquelo que lles suxire para ir dando forma ás súas esculturas. Unha vez rematadas deberán elaborar as tarxetas nas que poñan o título da obra e o autor/a.

A parte final divídese en dúas tarefas. Na primeira temos dous audios moi distintos e, por equipos, deberán conformar as esculturas vivintes para esas músicas. Esto quere dicir que eles/as, empregando os seus corpos, crearán unha figura estática para os audios. (Recordade sacar fotos de esta parte para a "exposición" e os portfolios!)
Finalmente propónsenos unha escultura moi chamativa para crearlle a nosa propia música. Poderemos empregar instrumentos da aula, efectos sonoros, instrumentos corporais, etc. Iremos axudando ao grupo con ideas coma "que son vos suxire esa cereixa brillante á fin da culler?" etc. Cando teñamos a obra rematada poderemos facer unha gravación.

O remate final é para que fagan unha reflexión escrita sobre todo o que vimos coas tarefas e tamén engadan aquelo que consideren oportuno así coma tamén se suxire que vaian incluíndo no seu portfolio datos e tamén reflexións de todas as partes da tarefa. Esto sirve tanto coma avaliación de parte do proceso coma para que eles vaian reflexionando sobre todo o que se está a tratar.


Son tarefas sinxelas e guiadas a través da web coas que despertar a curiosidade cara outras manifestacións artísticas, coñecer gustos e ideas do alumnado e desenvolver diversas habilidades e contidos artístico-musicais co motivador que ten crear un pequeno proxecto en equipo coma é a nosa sala de escultura e música do museo.


Agardo que vos guste, sexa útil e vos animedes a probalo nos vosos grupos!.
Saúdos desde a fiestra.

10/05/2016

A Historia en iconas de Whatsapp.

Que a Historia é unha das partes do curso máis temidas ou odiadas por unha ampla porcentaxe de alumnado é sabido e que temos empregado multitude de recursos para achegala dun xeito máis amable tamén.

Temos incluído documentais, historietas, tarefas de investigación, a inclusión de multitude de anécdotas históricas, a relación da historia co cinema, a música, a arte en xeral, temos convertido ao alumnado en historiadores, periodistas ou viaxeiros do tempo... todas estas cousas coa fin de que os primeiros mergullos nas profundiudades da Historia sexan o máis amables e motivadores posibles, coa fin de despertar curiosidade, atención e apartar medos e prexuízos.

E por si aínda non o tedes empregado hoxe achégovos unha das estrelas das sesións introductorias de Historia: As iconas de Whastapp.

Elaborei o recurso por primeira vez vai uns anos e... Bang! Resultou que aparte de atender e entender convertiuse nun recurso de estudo bastante satisfactorio. Tanto é así que no estudo de diferentes seccións da Historia eles mesmos crearon posters con liñas de iconas e, sen axuda de ningún texto, eran capaces de, sinalando as iconas, narrar as partes da Historia que prepararan. 

Entretido, sinxelo, útil e cun traballo activo de asimilación e reflexión ben valioso.

Velaquí vos deixo un exemplo dun pequeno resumo introductorio da Idade Moderna en Europa.


Agardo que vos dea ideas e vos sexa de utilidade.

Saúdos desde a fiestra!

01/05/2016

A nosa axencia de tempo libre.

Nestas alturas de calendario a maior parte de programacións de lingua estranxeira inclúen os termos relacionados con deportes, actividades de tempo libre, xogos de exterior, etc. E, por tanto, esta tarefa vennos perfecta.

Neste caso o alumnado deberá traballar de xeito cooperativo para crear a súa axencia de tempo libre seguindo os sinxelos pasos e materiais que proporcionamos na web.

No inicio elixirán o seu nome e logo. Enquisarán aos seus compañeiros e compañeiras coa fin de coñecer as súas actividades favoritas, (Deportes? Cales? Pintura? Música? Ciencia? Tamén engadirán aportacións imaxinando actividades que cren que triunfarían entre os seus compañeiros/as.


Nunha segunda parte elaborarán o horario das distintas actividades da súa axencia seguindo os criterios que eles/as crean e facendo un documento atractivo.

Na parte final crearán un tríptico ou cartaz que anuncie a súa axencia, co nome, o logo, as actividades que ofertan, modos de contacto e mensaxes atractivas ou ofertas. Tamén planearán como van presentar o seu traballo ao resto da clase.

É importante que o conxunto da tarefa está dividida nos distintos pasos e cada paso remata cun pequeno obxectivo logrado (na primeira deben cubrir un documento e entregalo, na segunda entregar o horario e a enquisa sobre como traballou o equipo, e na terceira o  triptico e plan de presentación). Non é unha tarefa especialmente aberta pero esto fai que sexa moi sinxela de plantexar sobretodo naqueles grupos que non están acostumados a este tipo de traballos colaborativos.


Tamén destaca o apartado de avaliación no que hai: Unha rúbrica para que poidan ter presentes aspectos sobre os que serán avaliados, un lámina que poden empregar durante as presentacións dos seus compañeiros para avalialos e outra individual que inclúe preguntas de autoavaliación e opinións sobre a actividade así como un valor sociométrico. (Tedes todas estas fichas para descaragar desde a propia web da tarefa)



Recomendo tarefas coma esta sobretodo para aqueles que desexan iniciar tarefas máis participativas e contextualizadas na área de lingua estranxeira e non facer tantas actividades e exercicios illados pero sen ter que embarcarse en proxectos dun recorrido moi longo. 

Saúdos desde a fiestra.