Amosando publicacións coa etiqueta axenda. Amosar todas as publicacións
Amosando publicacións coa etiqueta axenda. Amosar todas as publicacións

12/08/2025

Axenda(s) imprimibles e interactiva 2025-2026

 Bo día!

Un curso máis estou aquí para deixar a axenda que emprego eu por se é de utilidade.


Non prolongarei moito esta entrada, deixo a disposición: 

  • Axenda vertical: A que emprego eu, lista para imprimir a dobre cara.
  • Axenda apaisada: Algunhas compañeiras do meu cole apáñanse ben con este modelo así que volvín facelo por elas.
  • Axenda interactiva: Con lapelas superiores e laterales ademáis de interactividade nos calendarios. É un pdf interactivo que tamén se pode importar a GoodNotes e así.

  • Caderno adicional interactivo: É un caderno dixital moi simple, con algunhas lapelas e follas punteadas que a min me serviu os últimos anos.
  • Caderno-páxinas adicionais: Son arquivos de páxinas o caderno dixital pero por se alguén quere imprimilos ou combinalos coa axenda.

  • Calendarios do curso 25-26 e do ano 26.
Como explico sempre, eu para rexistros e avaliacións emprego iDoceo odesde hai moito tempo así que este material non inclúe iso...

Se algo de todo isto é de utilidade para ti, só tes que facer clic AQUÍ e descargar o que interese. sen máis, listo para imprimir ou usar no teu dispositivo.

Listo, agardo que esteades a ter un bo agosto e mando moito azos para a volta.

Saúdos desde a fiestra.

Publicado por en 17 comentarios:
Etiquetas: , , , , , ,
Ubicación: Galicia

08/08/2024

Axenda(s) 2024-2025 imprimibles e interactivas

 Un ano máis estamos aquí...

Non vou estender moito as explicacións; fixen de novo a miña axenda (a que uso, sen artificio vaia... en varios formatos) e ademáis, desta volta engado un pequeno caderno interactivo que empreguei o ano pasado (fixérao rápidamente e non chegara a subilo).



Eu só emprego esto: a axenda impresa e o caderno dixital xunto co mil veces mentado iDoceo onde gardo as cualificacións e esas cousas...

A miña axenda impresa é en formato vertical pero como teño unhas compañeiras moi afeitas á horizontal... volvinlla facer con agarimo tamén en apaisado.

Ademáis, fixen de novo o documento da axenda en interactivo para empregar nos dispositivos quen así o desexe. Deixo o formato .pdf interactivo coas lapelas laterais e superiores (tamén son interactivos os días de cada calendario mensual) e tamén o formato GoodNotes.

Como dixen, o curso pasado fixen para min un pequeno caderno interactivo que non ten nada máis que apartados separados (claustros, equipos, ideas, calendarios...) e follas punteadas que se van insertando; é, coma quen di, un caderno de anotacións dixital un pouco depurado pero é que eu non me adapto moito cos formatos ríxidos que teñen espazo para data, para orde do día... porque, por exemplo, esto último adoito pegalo en imaxe, engado ligazóns... non sei. O caso é que como o volvín facer queda aí tamén por se a alguén lle é de utilidade (tamén deixo o que serían as portadas e follas normais por se alguén as quere imprimir, combinar, o que sexa...)


Así que; se a alguén lle son de utilidade quedan AQUÍ (ou facendo clic na imaxe) todos os arquivos distintos listos para descargar e imprimir (ou empregar directamente no caso das interactivas).


Sen máis, agardo que esteades a desfrutar un bo agosto e que collades folgos e ilusións para setembro. 💙

Saúdos desde a fiestra!

Publicado por en 32 comentarios:
Etiquetas: , , , , , , ,

29/07/2021

Axenda docente 2021-2022 descargable

Xa estamos aquí, a piques de entrar en agosto, e chega a axenda docente...

Lembro que o curso pasado escribía sobre que facer a axenda era un xeito de atopar áncora nun curso que se viña plagado de incertezas porque... vaia marexadas levamos desde aquel 13 de marzo, a verdade.

Semella que á "normalidade" aínda lle vai faltar un pouco para chegar ás escolas e imos ter que seguir navegando entre ondas e remuíños (se cadra sempre o fixemos) así que haberá que agarrar os aparellos e botarse ao mar.


Deste xeito chega a miña nova axenda, sendo áncora e faro para min... como sabedes doutros anos é unha axenda/planificador moooi sinxela, mais é o que teño comprobado que funciona para min... (se buscades por "axenda" tedes algunhas entradas sobre como me fun organizando varios anos)

A axenda ten as capas, folla de datos, calendario escolar e parte para os horarios e despois follas para dividir os trimestres (poderíades movelas de sitio se fora preciso) un calendario de cada mes ao principio do mesmo con algunhas datas sinaladas e as follas da programación (semana vista)na que tamén se sinalan algunhas datas de interese. É dicir, o formato xeral é coma o dos outros anos e tamén repito o de incluír uns sutís puntiños de fondo que sirven de guía na escritura xa que estiven cómoda con eles...



(ligazón descargas)

Persoalmente imprimo en A4 (a dobre cara), o arquivo está listo para imprimir así sen máis (ou mandar a imprimir) e xa se podería encadernar (eu teño un caderno Filofax reutilizable de hai uns anos e é o que estou empregando pero é igual que encanutillar).

Ademáis, deixo un arquivo máis que contén: dous modelos de follas de táboa (tipo avaliación/faltas/retos...), un modelo de folla para os aniversarios e portadas simples doutras seccións/cadernos (claustros, cursos, ideas, reunións con familias, biblio...)


Non é unha axenda moi extensa nin con moita historia pero é o que me funciona a min (de feito eu imprimo por trimestres...) pero se a alguén lle é de utilidade aquí está para que a poidades descargar, podedes facelo no arquivo deslizable de arriba mais deixo tres ligazóns alternativas e xa sabedes que podedes contactarme (aquí, no instagram ou onde sexa) e non teño problema en mandala por mail:

LIGAZÓN CARTAFOL DE GDRIVE

LIGAZON WEB DESCARGA DIRECTA ARQUIVOS 

LIGAZON SLIDESHARE AXENDA

LIGAZÓN SLIDESHARE FOLLAS ADICIONAIS

(Teño a sensación de que slideshare está reducindo moito a calidade do arquivo, polo menos eu véxoo peor aí así que recomendo calquera das outras alternativas, se cadra a web da "descarga directa" é o máis sinxelo...)

Sen máis, aquí quedan os arquivos por se a alguén lle son de utilidade,  imprimir e listo!

Agardo que esteades ben e tendo un bo verán e que collades moitos folgos para o vindeiro curso e mándovos tamén...

Saúdos e saúde desde a fiestra!



Publicado por en 18 comentarios:
Etiquetas: , , , ,

08/08/2020

Axenda docente 20-21 descargable

Aquí estamos, 

Sen dúbida achégase o curso máis confuso ao que me enfrontei nunca (e mira que ao que rematou chegoulle!); a crise da Covid19 veu para remexelo todo a todos os niveis e a incertidume é inmensa, por máis "protocolos" que publican, as inquedanzas permanecen e sinto que imos cara unha marusía que non sei como navegaremos só que procuraremos non afundir mentres loitamos nas ondas por ter un ensino de calidade e seguro para todos/as.

No medio desta marexada eu tamén procuro áncoras; non podo evitar pensar, programar, "argallar" aínda que as múltiples variables que andan en xogo deixen todo con centos de fíos soltos (se se pode así, ou quizás mellor facelo deste outro xeito, ou se non...) e unha das áncoras foi facer a miña axenda deste curso, non está claro o que levará dentro pero o curso sucederá así que aferreime a unha das poucas certidumes (supoño).
Como sabedes doutros anos a miña axenda é moooi simple porque ao final, é o que uso eu, non son de levar grandes libros de avaliacións e demáis e incluso imprimo por trimestres... (tedes máis info sobre como me organizo nas entradas doutros anos).

Neste caso ten as capas, folla de datos, calendario escolar, horarios (algunha folla extra), portadas para cada trimestre e, diante de cada mes o calendario mensual (ademáis das follas da planificación de actividades (semana vista), claro) este ano procurei inclúir tamén no planificador e nos calendarios datas sinaladas (semana da prensa, día da muller, das Letras, etc.) así como uns sutís puntiños coma fondo de páxina que sirven de guía.

Ademáis tedes aquí outro arquivo con algunhas outras páxinas: portadas para claustros, Consello Escolar, cursos/grupos/PFPP..., a nosa biblio e ideas; tamén a páxina de "Parabéns para tí" e ademáis unhas pequenas fichiñas ou etiquetas para empregar como marcadores: dos meses do curso e de seccións (tamén follas adicionais e unha portada alternativa).

A axenda ten cor pero coido que está tratada dun xeito que se se imprime en escala de grises o resultado non ten porque ser malo, e eu, por exemplo, imprimín as capas (coa portada alternativa) en folios  de cor, ben, neste caso nos folios reciclados dos "antigos" esos que tiñan esa tonalidade entre marrón e grisáceo...


Chegará o novo curso e vai facer falta máis que ilusión e profesionalidade, chegará, sen dúbida, entre importantes medidas porque é como ten que ser, ademáis, para min, estas medidas esixen tamén máis investimento e persoal nos centros para minimizar os riscos e á vez procurar unha calidade educativa a todos os niveis; os equipos docentes non somos avaliadores de riscos sanitarios, nin médicos, nin arquitectos, nin... e coido que non podemos asumir tooodo ese tipo de responsabilidades sen axuda, pero isto é outra historia que da para moito... voltaremos ás aulas con ideas e forza, eu devezo porque chegue ese momento e ogallá sexa nunhas condicións seguras para todos/as e con recursos para continuar desenvolvendo experiencias educativas enriquecedoras, diversas, adaptables, participativas, etc. (non podemos dar pasos atrás na calidade...) o escenario non é cómodo e a lectura dos protocolos produce calafríos nalgúns puntos pero, como sexa, a vontade e a ilusión de cada curso están presentes e esas, poden ser outra áncora e outro faro.

Aquí queda a miña axenda, por se é de utilidade para alguén, non hai máis que descargar e imprimir (pódese descargar directamente desde os "slideshares" de arriba (aquí a axenda e aquí as páxinas adicionais) e quedan os arquivos tamén neste cartafol, se hai problemas sabedes que podedes contactar e mándovos os arquivos por mail) mentres, eu sigo procurando áncoras, faros e aparellos cos que navegar o curso que está por vir e mándovos moita sorte e folgos así como agardo tamén que desfrutedes na medida do posible das vacacións porque o certo é que, sen dúbida, van máis que gañadas.

Saúdos e saúde desde a fiestra!
Publicado por en 42 comentarios:
Etiquetas: , , , , , , , , , ,

27/08/2019

Axenda simple 2019-2020

Boas!
Estamos de volta, ben, case de volta... sabendo que hai a xente á que lle pode ser de utilidade subo a axenda simple deste curso que está a piques de comezar.



Como sabedes, eu levo case toda a organización de calificacións, asistencia, etc. en dixital (emprego iDoceo) mais non deixo de empregar papel á hora de planificar as sesións de xeito que este descargable non é máis iso, un planificador simple, procurando ser o máis lixeiro posible...

O certo é que para este curso que entra, un equipo do cole creamos unha axenda escolar propia, pensada para os nenos e nenas pero... que con tanto traballo e agarimo invertido nela agardo que sexa a que empregue...polo menos en parte; a risco de non adaptarme creei esta co formato doutros anos así que se vos é de utilidade... aquí a tedes!

Coma noutros cursos neste arquivo atoparedes:
  • Portada
  • Páxina de datos
  • Calendario escolar
  • Horarios
  • Planificador dos tres trimestres con candasúa portada.
  • Páxinas de reunións
  • Notas ao curso que ven
Todo iso listo para que imprimades e empreguedes coma mellor vos conveña (enteiro, por trimestres, con máis follas para reunións ou notas, eliminando partes, etc.)



Agardo que desfrutedes estos días e voltedes tamén con moitos folgos para o curso que entra! 

 Agardo tamén empregar e priorizar mellor o meu tempo este curso e poder así ir organizando e partillando aquí máis cousiñas por se lle son de utilidade a alguén!😅

Saúdos desde a fiestra!
Publicado por en Ningún comentario:
Etiquetas: , , , , , ,

30/08/2018

Axenda docente 2018-2019

Esto está a piques de comezar!

 Como sei que a moita xente lle pode ser de utilidade subo esta sinxela axenda docente descargable que fixen.




Como podedes ler en entradas doutros anos eu teño case toda a labor de calificacións, anotacións, programación, etc. dixitalizada (emprego principalmente iDoceo, moi útil e completa pero con moitísimo que trastear) así que esta axenda é en esencia un simple planificador xa que procuro que sexa moi lixeiro, de feito, sabedes por outros cursos que adoitei imprimir por trimestres para non levar peso de máis.

Aquí tedes o curso completo:

  • Portada
  • Páxina de datos
  • Calendario escolar
  • Horarios
  • Planificador dos tres trimestres con candasúa portada.
  • Páxinas de reunións
  • Notas ao curso que ven
Todo iso listo para que imprimades e empreguedes coma mellor vos conveña (enteiro, por trimestres, con máis follas para reunións ou notas, eliminando partes, etc.)

Con folgos e moitas ganas de ir subindo cousas que teño pendientes pecho esta entrada, agardo que todos e todas teñades moi boa entrada no curso, a disfrutar!

Saúdos desde a fiestra!
Publicado por en 20 comentarios:
Etiquetas: , , , , , , ,

10/08/2017

Axenda simple do 2º e 3º trimestre. Descargable

Hai uns días, nesta entrada, explicaba ou meu método "mixto" de organización no cal a axenda física é só un acompañamento necesario para min pero lixeiro que divido en trimestres mentres que o "peso" lévao o soporte dixital (visita a entrada anterior se queres saber máis sobre isto).


Aínda que para min é moi comodo levar só un caderno A4 delgadiño tamén comprendo a posible utilidade de ter todo o curso xunto de xeito que aquí van os outros dous pedazos da axenda simple que continúa co formato e estética que decidín para este curso e que podedes descargar libremente.





Agardo que vos sexa de utilidade e lembrade que tedes a parte do primeiro trimestre na entrada anterior.

Moi pronto entramos de cheo nos proxectos, tarefas e materiais de aula que devezo por ir compartindo en canto poida!

Saúdos desde a fiestra!
Publicado por en Ningún comentario:
Etiquetas: , , , , ,

08/08/2017

Organizando o curso 17-18! Axenda descargable, iDoceo e outras.

Chega agosto e ábrese a fiestra para que entre o aire! 
Chegadas estas datas unha xa deu unhas cantas voltas á organización, proxectos e materiais para o novo curso, a verdade. Xa teño unha ringleira de proxectos abertos e materiais en contrucción que moi pronto iredes vendo.

Ademáis, sempre se pensa en xeitos de optimizar a organización e planificación da globalidade do curso.


Como xa contara na entrada sobre organización do curso pasado, tras ter alternado entre anos nos que toda a miña organización docente era dixital e outros nos que empregaba moito papel e cadernos docentes físicos atopei a miña fórmula persoal, o que coido que máis se adecúa ás miñas necesidades, e é unha opción combinada.

Coma organizador de aulas, grupos, notas e rexistro de calificacións en canto a competencias e proxectos seguirei empregando iDoceo (só para dispositivos Apple), xa comentara que probara outros como "Cuaderno del profesor" e o de Additio mais cada día recomendo máis encarecidamente o iDoceo se o dispositivo que empregas ten a mazá por marca. As súas posibilidades, optimizacións e uso son cada vez máis sorprendentes e funcionais para todo tipo de docente e ademáis da gran capacidade de personalización que ten cada día incorpora funcións máis  interesantes, persoalmente intéresanme e destaco especialmente: 

  • Total integración co entorno Google Classroom.
  • Facilidade para a organización da avaliación do desenrolo de competencias cun completísimo sistema de xestión  de estándares e competencias (video explicativo máis abaixo, funciona incríble!)
  • Diario e planificador por día/semana tanto xeral como para cada grupo.
  • Integración coa asignación de insignias (badges) (moi interesante para todos os proxectos gamificados ou ludificados, e esta asignación de insignias pódese vincular tamén con Google Classroom)
  • Actualización e optimización da aplicación con moita frecuencia e xeralización no seu uso.

Non direi que é á máis sinxela de comezar a empregar pero cun chisco de tempo argallando é, sen dúbida, á que eu lle saco máis rendemento, tamén vai no gusto, recoñezo que cando empreguei "Cuaderno del profesor" e a de Additio a curva de aprendizaxe foi moito máis rápida e nun minuto tes andando un cuaderno sinxelo, con menos funcionalidades pero válido para moitas tarefas.


Tras curso desbotando o uso de papel recoñezo que eu preciso un pequeno soporte físico, moitas veces teño moitas frontes abertas, ideas, proxectos e tarefas que prefiro ter organizadas nun caderno no que escribo, borro, cambio, pego cousas, etc. e este tamén mellora a miña eficiencia.
Non gosto de cargar con pesadas axendas docentes (ou non docentes) só para a planificación de actividades de aula así que opto por elaborar unha que resulte cómoda e divídoa nos tres trimestres de xeito que levo unha pequena libreta. 
Aquí podedes descargar o modelo de axenda lixeira que fixen para o primeiro trimestre.



Coido que esta mesma semana subirei outra entrada con parte da organización de aula. Cantos/as empregades o portfolio do alumno/a? para min é un recurso moi potente e de valioso poder para o desenvolvemento de aprendizaxes, ademáis cada día hai máis xeitos de crealos, presentalos, etc. así que... pronto a miña idea, apps e demáis.

Xa teño varios proxectos e actividades no forno listas para ir subindo así que, comezamos de novo! Agardo que esteades a pasar unhas boas vacacións, desfrutade!

Saúdos desde a fiestra!

 Ups! Non quero marchar sen deixar mostra da curtametraxe (case media...) que crearon, guionizaron, prepararon, representaron e estrearon os rapaces de 1º e 2º do CEIP de Caión o curso pasado co soporte desta mestra e do seu incríble mestre de música, estos proxectos, claro, son  imposibles sen a impecable implicación de cada alumno/a así como a do resto do claustro e a axuda das familias, nesta outra entrada tamén podedes ver o proxecto "cinema na escola" por si vos animades!



ACTUALIZACIÓN: Nesta entrada podedes descargar xa a segunda e terceira parte da axenda imprimible! 
Publicado por en Ningún comentario:
Etiquetas: , , , , , , , , , , ,

19/03/2017

Axenda docente do terceiro trimestre

O tempo pasa voando... e coma quen no quere a cousa xa estamos inmersos en sesións de avaliación, boletíns e cerrando o segundo trimestre.




Coma fixen nos outros dous aquí deixo a axenda docente que emprego eu, é a que me facilita programar as actividades de aula xa que para o resto de datos (asistencia, rexistros de calificacións de traballos e probas, equipos, etc.) emprego o formato dixital. 

Personalmente para esto emprego a aplicación IDoceo pola súa capacidade de personalización, versatilidade, etc. mais nesta outra entrada xa recomendei outras que tamén funcionaron moi ben comigo e teñen certas vantaxes coma que son menos "engorrosas" aínda que permitan menos modificacións.

 Aquí podedes acceder á axenda lista para ser descargada e imprimida a doble cara, o certo é que estou moi satisfeita con ter dividido a axenda nos tres trimestres para non cargar cun formato innecesariamente pesado e pouco manexable como o que empreguei nalgunha outra ocasión.



Deséxovos a todos e todas que teñades moi bo final e inicio de trimestre, que manteñades a ilusión, que as carreiras por abranguelo todo non vos amolen e disfrutedes da viaxe e que non esquezamos que a aprendizaxe está no proceso e non no resultado.

Moi pronto teredes por aquí máis ideas, proxectos xogos e experiencias que xa estou desexando partillar en canto lle roube un pouco de tempo ao tempo.

Para abrir boca déixovos un video realizado co galo do 8 de marzo, día da muller. Fixemos un pequeno estudo da orixe da celebración do día, análise da situación actual, un amplo debate que nos levou varias sesións, etc. no que tamén empregamos este outro video que realicei para visualizar aspectos relevantes da conmemoración deste día, e tras moito conversar e confrontar ideas fixemos unha lista común de enunciados para a creación do video.





Saúdos desde a fiestra!
Publicado por en Ningún comentario:
Etiquetas: , , , , ,

22/12/2016

Axenda docente do 2º trimestre

Remata o trimestre que parece que pasou voando... hai un montón de recursos e ideas preparados para ser compartidos en breve mais, polo de agora,  aquí ven a axenda do segundo trimestre!

Como comentei NESTA entrada, despois de cursos nos que empreguei opcións só dixitais con Apps como as que recomendaba (iDoceo, Additio, Cuaderno del profesor, etc.) e outros nos que empregaba cuadernos docentes en formato físico este curso optei por unha opción combinada.
Para calificacións, grupos, etc. estou empregando iDoceo, pola contra emprego unha axenda física para anotacións, programación de actividades de aula...


Como para min é importante non cargar con enormes axendas que acumular traballo de todo o curso optei por facer unhas trimestrais o máis lixeiras posible.

Así que, igual que fixen ao comezo do curso aquí tedes para imprimir a miña opción do segundo trimestre, que continúa coa mesma liña do primeiro.



Esta axendiña está lista para descargar e imprimir a doble cara ou adaptar ás nosas necesidades e inclúe:
  • A portada e o estampado traseiro da mesma.
  • A folla dos datos (non vaia ser que a perdamos!)
  • O calendario escolar (segue sendo o da Coordinadora Galega de Equipos de Normalización Lingüística)
  • O espazo para os horarios
  • As follas de organización semanal con calendario trismestral e o espazo para cada día da semana (luns a venres) así como espazo para anotacións e recordatorios.
  • A portada para incluír as follas de anotacións e proxectos ao final da axenda.



Sei que moitos remataremos o segundo trimestre bastante antes da chegada das vacacións de pascua (por equilibrar a duración dos tres trimestres) pero aínda así incluín ata a metade do mes de abril para poder adaptala ás necesidades de cada centro e profe.

Para min está sendo bastante operativa e valoro moito que quede algo bastante manexable e de pouco peso xa que con esto e a App teño todo listo.

Agardo que vos sexa de utilidade, se queredes a miña opinión sobre as distintas apps de xestión docente que coñezo recoméndovos pasar pola entrada de organización do curso na que falei delas desde a miña experiencia.

Saúdos desde a fiestra!
Publicado por en Ningún comentario:
Etiquetas: , , , , , , , , , , , , , , ,

18/08/2016

Organizando o curso: axenda docente e apps.

A pouco de comezar un novo curso escolar pareceume boa idea traervos os materiais esenciais cos que organizo os meus días.

Xa vai uns anos que optaba por ter todo (ou case todo) dixitalizado, para o cal empregaba unha tablet, mais, a gran cantidade de grupos e alumnos/as aos que din clase o ano pasado fixéronme ter que engadir, de novo, parte de soporte en papel e, este curso, optarei por unha opción combinada, sinxela e, sobre todo, lixeira. 

A mistura da que vos falo consiste, no meu caso, en empregar as aplicacións de xestión docente da que vos falo un pouco máís abaixo para todo tipo de calificacións e rexistros do alumnado coma viña facendo e empregar unha axenda trimestral en papel que elaborei para a planificacion de distintas actividades ou proxectos de aula ou para anotar todo o que considero que debe estar máis á man ou é máis útil aí que no dispositivo.

A axenda en papel que podedes descargar e imprimir é moi sixela, consta só catro elementos diferenciados:
- Unha portada.
- A folla dos datos persoais.
- Unhas plantillas para incluír os horarios que precisemos (persoais, de grupo, de aulas, biblioteca...)
- Un calendario escolar (neste caso o que teñen colgado na web da Coordinadora Galega de Equipos de Normalización Lingüística)
- As follas de planificación semanal que constituirán o groso da axenda; cun pequeno calendario na parte superior e moito espacio en cada día para completar todo o necesario en cada sesión ou periodo, etc.
- Unha portada interior de anotacións que da paso a algúns folios en branco (ou ben papel pautado ou de cores) para anotacións varias.

Incluín tamén dous separadores que se poden eliminar mais están coa fin de que se imprimimos todo o documento a doble cara quede cada páxina no seu lugar  e vexamos a semana completa ao abrir o caderno.

Esta axenda comprende desde  o inicio de Setembro ata finais de Decembro e, en Xaneiro, comezarei unha similar coa fin de que sexan funcionais e lixeiras. 
Sobre as aplicacións de xestion docente; por si vos sirve de referencia, os anos nos que traballaba só cunha tablet con sistema operativo Android probei diversas Apps como a de Additio pero sen dúbida a miña favorita naquel tempo foi "Cuaderno del Profesor" (ten versión Lite, gratuita e outra de pago) intuitiva moi, moi simple e super eficiente, mais seguro que agora hai outras moitas opcións máis completas. (Tamén empregaba ferramentas de Google para completar a dixitalización de todo o necesario, desde as reunións, programacións de aula, recordatorios...)

Agora, levo dous cursos completos nos que o que emprego é un iPad e, para o seu sistema operativo, a oferta de Apps de xestión docente é enorme. Tras probar e indagar, comecei a usar iDoceo, unha aplicación con miles de usuarios, e, sen dúbida, é a que maís me gusta e a que mellor se adapta no meu caso.

Pode resultar confusa ao principio xa que non é tan intuitiva coma os outros exemplos mais esto é o que permite que sexa moi personalizable e adaptable á situación de cada docente. Podes crear e descargar moitos tipos de plantillas para notas de toda índole, combinalas, modificalas, engadir as célebres rúbricas, etc. En definitva, é unha aplicación coa que, se lle adicas un pouco de esforzo ao comezar o curso, aforrarás moito tempo durante o resto de meses e terás todo organizado e sinxelo para xestionar; un gusto.

Ademáis, nestas aplicacións tamén temos outras moitas funcionalidades que podemos explorar: diario, apartado para todo tipo de datos do alumnado, xestión de faltas, exportación de datos a documentos ou para imprimir, planos da aula para organizar mesas ou recunchos... de xeito que cada un acabaremos por empregar aquelas que nos axudan ou facilitan máis a nosa labor concreta nos centros.

 En resumidas contas, coa axenda impresa e a apliación iDoceo é como eu comezarei a organizar o novo curso escolar aída que é un aspecto que vou adaptando ás necesidades de cada ano así que engadirei novos aspectos e materiais en futuras entradas.

Agardo que cheguedes coas pilas moi cargadas e con moitas ideas para o novo curso!
Saúdos desde a fiestra!




Publicado por en 2 comentarios:
Etiquetas: , , , , , , , , , , , , , , ,
Subscribirse a: Publicacións (Atom)