Amosando publicacións coa etiqueta ESO. Amosar todas as publicacións
Amosando publicacións coa etiqueta ESO. Amosar todas as publicacións

28/04/2022

Letras Galegas 2022: Florencio Delgado Gurriarán

Ola!

Sigo por aquí, e veño cun material que levo bastante tempo preparando...

Non é sorpresa ningunha que unha das miñas conmemoracións favoritas é a das Letras Galegas... e o homenaxeado deste ano... vaia gusto de traballo, foi unha madeixa que fun desenleando moi aos poucos (falamos de meses) e desfrutando moito o camiño, atopando arquivos, citas, documentos de moi variada tipoloxía e moito interés. E con tanta información pois... ademáis de falar de Florencio Delgado (moito, xa o sinto polas persoas achegadas) pois quería traducir parte da información a distintas tarefas de descubrimento... non sabía moi ben pero eu estaba tan emocionada...


O caso é que na escola fun facendo cousas, retos, guións radiofónicos, pequenas investigacións, lecturas...

E montei unha sala de fuga baseada en documentación real sobre a vida e obra de Florencio Delgado Gurriarán, pensada para os últimos niveis de primaria e secundaria, (4º de primaria, 5º, 6º...) e ademáis da dixital estiven collendo e modificando algunhas das probas para xerar unha "sala de fuga" real (como as que facía pre-pandemia, digamos).

Imos primeiro coa versión web. 

É un xogo de probas no que cada pantalla ten e aspectos da vida e obra de Florencio Delgado cos que obter constrasinais para ir desevelando cada vez máis información (e evitar que o feitizo "Lobos da xente" oculte todos os datos e obras) todo ganduxado con anacos e selección de documentos reais que fun compilando.


Neste xogo empreguei documentos dunha entrevista real que lle fixeron en Guadalajara (México) e da que tamén atopei a transcrición literal, xenuínos telegramas sobre os "barcos da liberdade", o documento real da listaxe e datos dos pasaxeiros/as do Ipanema (barco no que emigrou) e mesmo os diarios que se editaron na propia viaxe, obras, revistas, poemas, homenaxes, etc.)

Así que AQUÍ queda por se a alguén lle é de utilidade ou lle serve para descubrir a este homenaxeado co que eu xa tanto levo desfrutado.


Por certo, na web do xogo queda tamén un apartado de "referencias" con todas as ligazóns e documentos empregados completos que coido que poden ser de utilidade para moitas outras cousas, actividades, investigacións ou mesmo saciar a curiosidade que poida xerar o asunto...

Sobre a sala de fuga "real", a intención é que a xoguen os grupos maiores que non participaron noutras tarefas cara o comezo do mes de maio; e para pasar esta a ese formato o que fixen é transformar un pouco as probas e os resultados que dan; uns levan a sobres con números ou caixas (por exemplo caixas con nomes dos barcos e dentro da correcta unha proba e outra caixa con fechadura á que chegarán noutro momento coa chave, outras directamente a distintos tipos de cadeado...). (Tamén organicei para que cada equipo comece nun punto dinstinto e así non coincidir nos retos á vez)
Cara o final preparei unha diferenciación na que cada un dos 4 equipos ten unha proba que lles da; por un lado unha chave para o cadeado final e por outro un reto no que sacar unha foto cunha cámara instantánea formando cos seus propios corpos unhas letras.
Entre as letras dos catro equipos deben concluír formando as palabras "Galiza infinda" coas que, se son montadas sobre unha plantilla coma como a que poño aquí debaixo, entre todos terán o código do último cadeado (cadeado de 6 letras) co que abrir a derradeira caixa e obter a recompensa.


De verdade que desfrutei moito con toda esta información e documentos e creo que os cursos aos que nomeei "especialistas en Letras Galegas" e xa xogaron tamén, así que se a alguén máis lle é de utilidade... eu feliz.

Tede unhas boas letras, envío folgos!

Saúdos e saúde desde a fiestra!


Publicado por en Ningún comentario:
Etiquetas: , , , , , , , , ,

01/05/2021

Descubrindo a Xela, un xogo polas Letras

Ola! 

Estou aquí...

Entre as cousiñas que se me van acumulando non quería deixar de partillar o xogo interactivo "Descubrindo a Xela" que fixen co gallo do Día das Letras Galegas.


Se ben é unha conmemoración da que desfruto moitísimo e coa que xa levamos bastante tempo traballado, agora que se achega a data en si, creei un xogo de pistas no cal deberon procurar información pola "biblio" (virtual). A historia cóntalles que estaban tan concentrados/as na biblio que todo o mundo marchou e quedaron dentro e que agora deben recoller a información e saír cos arquivos necesarios antes de que chegue o autobús.

Nada máis comezar aparecen (virtualmente) dentro dunha biblioteca pola cal deben ir buscando as pistas e superando os retos ata chegar a pantalla final para saír coa documentación. (Ollo, deu algún erro o xogo con aqueles rapaces/zas que abrían empregando Firefox pero abrimos con Chrome e foi perfecto)

Podedes acceder desde ESTA web que abre con este pequeno vídeo como disparador da actividade

[Ligazón: https://afiestradamestra.wixsite.com/descubrindoaxela ]

A pantalla final do xogo premia aos/ás, agora, expertos/as en Xela Arias coa posibilidade de participar nun proxecto de fotografía e poesía (en realidade farémolo todos/as na clase) que aínda está en construción pero tamén cun montón de recursos (cos que sae da "biblio" despois da investigación), desde o vídeo-documental en capítulos sobre Xela Arias da RAG, a unha listaxe de cancións da cal estamos empregando algunha e distintos cursos, o programa de radio que fixeron, etc.

O que fixen cos máis maiores foi pedirlles que xogaran de xeito individual (teñen un disposittivo para cada un/ha) e, a primeira persoa en chegar á pantalla final debeu achegarse a unha zona cun pulsador, botar xel e pulsar, entón todos/as levantaron as mans do teclado, se a persoa que pulsou é quen de dar resposta ás 5 preguntas dunha tarxeta que lle formulo gaña o xogo, se non é así volve ao sitio e todos poden seguir xogando mentres el/ela e pode buscar máis información; se outra persoa remata repite o proceso do pulsador e formúlanse as preguntas doutra tarxeta e así... (en realidade, nunha clase, dous dos que chegaran ao final aliáronse para dar resposta ás preguntas)

Deixo AQUÍ algunhas tarxetas tamén por se as queredes empregar..


Ao final é unha actividade bastante sinxela pero que me permitiu traballar distintos aspectos que precisaba e coa que o pasamos bastante ben, a verdade, así que se a alguén lle é de utilidade aquí queda...

Agardo atopar os momentos para partillar as cousas que van quedando no tinteiro, mentres... algunhas déixanse ver de cando en cando polo Instagram se queredes botar un ollo...

Agardo tamén que esteades todos e todas ben, sen dúbida está sendo un curso complicado e os niveles de... estrés (entre outros sentimentos e sensacións) son altos así que envío moitos folgos a todas e todos.

Saúdos e saúde desde a fiestra!
Publicado por en 2 comentarios:
Etiquetas: , , , , , , , , ,

16/04/2020

Letras Galegas 2020: Carvalho Calero! Un "escape room" dixital.

16 de abril! 
Non sei como chegamos ata aquí pero de súpeto resta só un mes (e un día) para o Día das Letras Galegas, un Día das Letras que non se sabe como vai transcurrir, polo de agora con actos oficiais adiados a outubro e con voces que se erguen pedindo un 2021 para Carvalho Calero... é que... tantos anos agardando por un Día das Letras para el e agora... semella que temos outras cousas máis urxentes que atender.

O certo é que si, afirmativo, temos outras cousas máis urxentes que atender pero ben, aínda así achego a miña proposta, adaptada a tempos de confinamento. 
É unha proposta pensada para 6º de primaria e secundaria (tamén para que a probedes os adultos).

O caso é que eu, en terceiro ciclo, como sabedes, adoito crear unha especie de "Break Out" ou "EscapeRoom" distinto cada ano (aquí no que liberaron o antídoto contra a desigualade o ano pasado) e este ano faría algo similar... mais as cousas mudaron pero seguindo un pouco ese espíritu e pensando en que tiveran algo semellante pero desde o fogar creei este "Break Out" dixital.

É un xogo de pistas, códigos, investigacións... como unha serie de puzzles con informacións sobre o Día das Letras e sobre Carvalho Calero para ir descubrindo e que van dando contrasinais para ir de pista en pista obtendo información.
Por suposto, eu tamén agardo e desexo estar nas aulas para o 15 de maio (o 17 é domingo) pero como todas e todos sabedes, polo xeral, o traballo para o descubrimento e coñecemento do homenaxeado adoita comezar bastante antes... así que esta foi a miña argallada para ilo facendo.

Un xogo que nos reta e pretende entreternos un anaco do día e, de camiño, descubrirnos a Ricardo Carvalho Calero e o seu enorme labor a prol da nosa lingua.





O xogo coido que funciona de xeito aceptable nos móbiles mais sempre será máis doado usalo en ordenador, é unha forma de achegar a celebración do día e tamén información sobre o homenaxeado, a súa vida e obra, aos fogares (ou aulas de informática...) Encantaríame que o probarades se vos apetece (e que participarades do "Cadavre Exquisito" final tamén...).


(Clic para acceder ao xogo)

 


Déixovos co xogo, por si a alguén lle é de utilidade, como todo, podedes empregalo libremente, compartilo,...

Agardo que vos sexa de interese e/ou utilidade. 

Saúdos e, sobretodo, saúde desde a fiestra!

(solucionario de códigos)


Publicado por en 12 comentarios:
Etiquetas: , , , , , , , , , , , , , ,

26/03/2019

"Escape room" coeducativo. Materiais, organización e experiencia.

Boas, 
Xa hai un tempo que viña maquinando este "escape-room", como sabedes fixen un o ano pasado sobre música que podedes ver nesta outra entrada e, este ano, inmersos no proxecto de centro, que é "Mulleres" preparei, para sexto, un novo. Velaquí vai a experiencia, a organización e os materiais...é unha entrada longuiña así que, se tes interés, colle asento.


Hai moitas formas de preparar actividades deste tipo mais esta sigue, en esencia, os pasos da do ano pasado (os pasos esenciais están explicados na entrada do ano pasado...). Eu tiña claros os obxectivos, os contidos a tratar, as habilidades a desenvolver así que a partir de aí pensei a narrativa.

Narrativa:

O primeiro que fixen foi crear a narrativa, o alumnado enfrontaríase a un reto xeral que é o seguinte:

 Secuestraron a unha persoa e con ela teñen o antídoto para a desigualdade que eles e elas, superando enigmas e probas deben liberar.

Coma o ano pasado, para introducir a temática fixen un vídeo que é o seguinte:


Probas ou retos:

Despois preparei as probas, ideei 6 "probas tipo" distintas que modifiquei para cada equipo (en realidade, podes facer que cada equipo supere as mesmas probas con distinto resultado e se xunten, ou non, ao final) mais eu opto por facer algunhas distintas. As miñas foron:
  1. Liña do tempo: Fixen uns tarxetóns con imaxe título e datos para crear unha liña do tempo sobre mulleres e movemento pola igualdade, fixen moitas (27) (podes velas e descargalas máis abaixo, obviamente a solución estaba tapada) así que cada grupo recibía unhas 5 distintas para as que debían buscar data e ordenar (ao ordenalas obtiñan un código de tres cifras que abría un candado dunha caixa onde obtiñan o seguinte reto). 


  2. Test mitos do amor romántico: Fixen un test de verdadeiro ou falso con frases relativas ás relacións sás, estereotipos de xénero e mitos do amor romántico. Unha vez respostado verdadeiro ou falso tiñan unha indicación, cada resposta verdadeira valía 2 puntos e cada falsa 1 (noutros equipos a conta era distinta...), ao sumar obtiñan unha cifra que era a clave de acceso a unha web que preparei.

    (AQUÍ Ligazón ao arquivo en GDrive)

  3. Quen ves sendo? Nunha dirección web á que accedían obtiñan unha fotografía e 3 pistas coas cales debían procurar na rede o nome desa muller, esta tamén foi distinta para todos os grupos (Lynn Margulis, Lise Meitner, Emma Watson, Chimamanda Ngozi e Kathrine Switzer), unha vez atopado o nome debían introducirlo coma contrasinal de acceso a outra páxina que daba a seguinte pista ou reto. (A web do proxecto completo é esta, por si queredes fedellar, aínda que cuns formularios de Google ou así pódense crear pistas agochadas cun contrasinal de xeito moi sinxelo)


  4. Andeis coeducativos: Un reto sinxelo propoñía unha pista coa cal debían atopar a que libro nos referiamos, todos eles dispostos nos novos andeis coeducativos da biblioteca do cole, atopado o libro, dentro deste, estaba a nova pista ou proba.

  5. Creación: Todos os equipos tiveron un reto de creación, unha vez que o atopaban debían elaboralo e ensinarmo a min. Uns tiveron que crear o "Doodle" de Google para o 8 de marzo, outros un anuncio publicitario para fomentar o préstamo de obras dos andeis coeducativos, outros crear unha estrofas de regueifa sobre o antídoto que buscan, outros crear uns Haikus e outros, empregando libros do espurgo e recortando palabras crear unha breve narración ou poema relativa ao tema. (ben puideran ser outras mil cousas, receita contra a desigualdade, cartaz de película sobre o escape-room, anuncio radiofónico contra a desigualdade, foto e slogan.... ). Unha vez que eu daba o visto bo dáballes o seguinte reto.
  6. Alianza de equipos: Se ben os equipos chegaban ás outras probas en diferente orde e momento, esta proba era a última para todos e nela suxeríase que se aliaran. Uns equipos tiveron que aliarse para, coas liñas de tempo parciais de todos os equipos, formar a liña do tempo completa (ao ordenala tiñan unha secuencia de frechas que abría un candado direccional e outra de números que abría un "dixital") Outros equipos tiñan que completar unha encrucillada coa axuda dos outros equipos ao precisar os nomes das mulleres da proba 3 (Quen ves sendo?") esas encrucilladas tiñan unhas celas sinaladas cun símbolo ou formas xeométricas e ao final da páxina un código que empregaba esos símbolos escrito que os levaba a distintos lugares (unha pizarra na que atoparon un código de 3 cifras para un candado, un armario no que atoparon unha chave pegada baixo un dos andeis, etc.)  Todos estos candados finais cerraban a última chave,  a que abría o "cofre" do antídoto que estivera no medio da aula durante toda a sesión, así que para liberar a chave todos os equipos tiñan que superar os seus retos.


Logro final: O antídoto

Unha vez superados todos os retos e conseguida a chave final dirixíronse (ao tolo xD) cara a urna do antídoto alí atoparon:
  • Unha mensaxe escrita: "Noraboa! Que? Que non hai antídoto, mirade ben ao espello..."
  • Un espello: No espello estaba a inscripción "O antídoto sodes vós"
  • Un montón de doces (xa, xa sei que non é moi saudábel nin pedagóxico supoño...)
  • Unha caixiña metálica (mais espello...): Ao abrila tiñan a mensaxe máis estendida e uns "amuletos contra a desigualdade" que fabriquei coa fin de que lles servira coma "tótem" ou recordo da experiencia.

Posta en común e conclusión:

Na seguinte sesión despois da experiencia fixemos a posta en común e tratamos tamén aspectos de probas ás que tiveron que adicar máis tempo do esperado (por exemplo, nunha, aparentemente tan sinxela coma o test dos mitos do amor romántico houbo bastante discusión (moi sá e enriquecedora por outra parte) así que tratámolo de novo e ofertei novas alternativas onde poder informarse máis sobre este tema, falamos tamén dos aprendizaxes, do significado das tarefa e probas, das dificultades, das sensacións que produciron e tamén, por suposto, do significado do antídoto.

Ademáis, cada un/ha recibiu un post-it no que escribir algunha impresión (anónima ou asinada) que despois dispuxemos nun taboleiro.



 Que que tal? A experiencia foi, de novo, moi satisfactoria para todos/as mais velaquí van elementos a mellorar:
  • Creación de equipos: Este ano o grupo estaba moi interesado en crear eles mesmos os equipos pero a experiencia puidera ter sido mellor cun pouco de man da coordinadora (eu), o ano pasado cada equipo tiña tres tarxetas de "axuda" que podía entregarme se precisaban unha pista ou algo, este ano houbo un equipo que precisou moita intervención miña mentres os outros eran autónomos.
  • Tempo: Mentres que a experiencia do ano pasado cumpliuse nos 50 minutos de sesión esta tomou case unha hora e media (grazas que eu dispoñía dese tempo e que o titor tivo a ben "deixarme" aos rapaces/zas para rematar) en gran parte por dous motivos:
    • Conexión: Este ano cambiou o espazo da aula de música e a conexión é moito máis lenta polo cal os equipos tardaban moito en superar as probas de investigación, de non estar ocupada a aula de informática (estando preto da de música) tivera sido mellor opción deixarlles empregala.
    • O equipo rezagado: O equipo que precisaba moita axuda ía sempre un par de probas por detrás dos demáis e para abrir o último candado houbo un tempo de agarda.


Supoño que os "escaperooms" son agora unha moda, mais tamén é certo que a dinámica, ben plantexada e contextualizada, coma todas, podo decir que funciona, o alumnado pon en práctica moitos mecanismos de aprendizaxe, cooperación, investigación, pensamento, etc. cunha importante dose de motivación e tamén é unha tarefa que da moitísima información ao docente que a aplica. Está claro que non é unha dinámica para facer a diario pero para min é unha das experiencias máis ricas do ano; unha búsqueda do tesouro que se pode plantexar de moitas maneiras desde formas máis sinxelas a máis complexas e todos os seus aspectos.

Anímovos a probar, coido que deixei case todo o material e como o organicei mais se esquecín algo ou tedes algunha pregunta non dubidedes en facela que boto un cable!

PD: Sobre os candados, todos os meus, polo menos os máis "diferentes" coido que son de Amazon (o de letras, o direccional, o de apretar números) tamén empreguei algúns dos típicos de ximnasio de 3 cifras e dous de chave.

 Agardo que vos sexa de utilidade!
Saúdos desde a fiestra!

Publicado por en 6 comentarios:
Etiquetas: , , , , , , , , , , , , , ,

01/08/2018

Materiais arredor de Wonder

Chega agosto e pouco a pouco vai voltando a actividade...

Para ir abrindo boca ao novo curso traio algunhas ideas arredor da novela Wonder, é que tiña xa moitas ganas de falar dela polo blogue.


Wonder é un libro (e unha colección) protagonizada por August Pullman, e o certo é que é moi difícil que, se cae nas mans dun docente, este poida resistirse a levalo ás aulas porque é unha marabilla,  é coma se todos/as pensáramos "esto é preciso que o lean os rapaces/zas" e, de feito,o movemento xerado por este libro en aulas de todo o mundo é enorme.

 O caso é que Auggie é un rapaz de 5º de primaria, ten 10 anos e o síndrome de Treacher Collins, un trastorno xenético caracterizado por malformacións craneofaciais. 
No libro "Wonder, La lección de August" [CAST] é el mesmo quen nos conta as experiencias, sensacións frustracións e superacións que vive cando por fin asiste ao cole e tamén distintos personaxes contan a historia desde o seu propio punto de vista.

Aquí traio un material de libre descarga que preparei, neste caso, para empregar cando todo o grupo le a novela ou nun clube de lectura... e está dividido en 4 partes.

  • A primeira sección do material son preguntas (abertas e pechadas) sobre cada parte do libro para promover o debate, a comprensión e a reflexión.Pódense ir facendo todas, só algunhas, unhas en conxunto e outras de xeito individual...
  • A segunda son unhas tarxetas de propostas de escritura breve (un ou dous parágrafos) relativas ao libro e esixen un pouco máis de reflexión e elaboración que as preguntas iniciais.
  • A terceira parte son unha serie de actividades propostas que abranguen distintos estilos (cómic, crítica literaria, poesía, arte...)
  • E a cuarta é para a realización dunha tarefa en equipo, neste caso unha campaña fotográfica, inclúe as indicacións, pasos, ficha de idea e boceto do grupo e tamén a rúbrica para que a poidan ter presente en todo o proceso.

Coido que si botades unha ollada ao material entenderedes mellor todo isto.


O certo é que o libro parece perfecto para os rapaces da mesma idade de August pero tamén é moi sinxelo de ler e cada parte está dividida en mini capítulos de apenas unha páxina; xenial para traballar a distintos niveis, en distintos momentos e de distintas formas xa que se adapta desde tempos moi curtos de lectura compartida e traballo a procesos máis longos, así que se aínda non lle botaches unha lectura, anímote a que o fagas.

 Por certo, uns apuntes finais; aínda que este material está en galego, de momento, a novela non está traducida e a lectura facémola en castelán e outra cousa interesante é que se fixo unha peli baseada no libro que pode ser un bo recurso para culminar todo o traballo sobre o mesmo!

 Pouco a pouco volto á fiestra con máis cousiñas, agardo que esteades a disfrutar do verán!

 Saúdos desde a fiestra!
Publicado por en 3 comentarios:
Etiquetas: , , , , , , , , , , , , , , ,

30/08/2017

10 Apps para calquera clase!

O regreso ás aulas xa está asomando cun novo curso cheo de expectativas, ideas e proxectos; estamos de volta! (Aquí tedes unha entrada con actividades e materiais para os primeiros días para botar unha ollada)

Cada vez que alguén emprega ou nome unha aplicación para empregar nas aulas vennos á cabeza aquelo de "é que hai apps para todo" e é certo que existen moitísimas aplicacións adicadas ou que se poden adicar á tarefa educativa máis alá das de organización docente e as clásicas de creación (iDoceo, Genially, Prezi, etc.)


Se ben hai aplicacións adicadas a áreas ou asignaturas concretas moi interesantes como as de programación sinxela tipo Scratch ou Hopscotch, moitas de música, idiomas, etc. Hoxe quero achegar unha selección de aplicacións que se poden empregar en variadas situacións incluído ademáis varias para as que non é necesario ter varios dispositivos para a aula.

Aquí van algunhas das miñas favoritas:

PLICKERS

A primeira que quero destacar é Plickers, é unha aplicación xenial para a realización de preguntas, tests, enquisas, votacións, etc. e que so precisa un único dispositivo na aula (que ben puidera ser o móbil persoal do docente) sobre esta aplicación e como se emprega tedes unha entrada enteira aquí. Sen dúbida unha das miñas favoritas e máis empregadas ao longo do tempo.





Layar (e tamén Aurasma) son aplicacións para traballar con Realidade Aumentada, a primeira é, na miña opinión algo máis sinxela, moi útiles e interesantes para variadísimas actividades, por exemplo, os rapaces/zas poden crear vídeos de opinión sobre libros que lean e estos insertarse en Realidade Aumentada nas portadas deses libros, ou crear obras de arte cuxa explicación personal pode escoitarse ao ser escaneadas, explicar mapas... as posibilidades son infinitas.





SeeSaw: É unha aplicación adicada á creación dun portfolio dixital de forma moi sinxela e desde os niveis do alumnado máis novo. Os/as alumnos/as poden acceder cun código da aula que lles sexa proporcionado de xeito que non hai que completar farragosos formularios de inscripción nin hai necesidade de que teñan un e-mail asociado. 

Cada alumno/a pode engadir ao seu portfolio (ou ao de varios compañeiros se, por exemplo, o traballo foi en equipo) fotos, vídeos, debuxos, documentos, anotacións e ligazóns e tamén engadir comentarios en audio ás fotos, debuxos, etc. Ademáis o mestre/a pode revisar cada elemento antes de ser "publicado", facer anotacións, avaliacións, enviar mensaxes, crear cartafoles para que a clase acceda. É unha aplicación moi, moi sinxela para todo o que oferta e á que tamén poden acceder via web (nunha aula de informática é unha opción). Recomendo moitísimo que lle deades unha oportunidade.


Esta non é propiamente unha aplicación para dispositivos móbiles xa que se emprega no propio navegador do ordenador da aula pero é que é unha marabilla. Chámase Classroom Screen, accedendo a Classroom Screen podemos seleccionar os widgets que desexamos ter en pantalla e podemos incluír prácticamente todo o que precisamos, ademáis está dispoñible en varios idiomas, entres eles o galego, podemos mostrar ao alumnado a hora ou un cronómetro simplemente engadíndoo, tamén un semáforo no que activar o verde, vermello ou ámbar dependendo do significado que lle otorguemos ás cores, empregar símbolos de traballo seleccionando o apropiado para o momento da sesión (traballo en equipo, discusión en parella, falar baixiño ou necesidade de silencio), aínda inclúe máis cousas! un bloc de notas de de escritura e tamén de debuxo (ambos pódense facer pantalla completa cun clic se é preciso), podemos ter códigos QR na pantalla, simplemente engadindo a dirección web e o código xérase automáticamente para que o poidan escanear. Por si non fora suficiente  pódese incluír tamén unha calculadora, un selector aleatorio no que se poden poñer nomes, grupos, actividades...  Todas estas funcionalidades poden engadirse ou non na pantalla ao noso gusto e usos, moi, moi útil e incríblemente sinxelo, un 10.



Classdojo (e Classcraft para máis maiores): mundialmente coñecida, esta aplicación, creada nun inicio como xeito amable e divertido de xestión de comportamentos evolucionou co propio uso por parte dos docentes para formar parte de moitas das gamificacións de aula cunha narrativa e formas de gañar e peder "poderes", "forzas", etc. de xeitos moi interesantes. 



Greenscreen e Touchcast: Son dúas aplicacións para a realización de vídeos con croma, sinxelo, (greenscreen moi sinxela, sobretodo para que a empreguen os alumnos/as de forma autónoma)  útil e con gran acabado, facer un telexornal? explicar un documental? crear unha aventura?

Spreaker: Unha aplicación tamén dispoñible en versión web para a creación de podcasts na clase, moi sorprendente polas súas funcionalidades.




Nearpod, esta aplicación pretende a elaboración de sesións interactivas permitindo a inclusión de presentacións, documentos, contido multimedia (video, foto, realidade aumentada, etc) e incluíndo creadores de actividades, o alumnado tamén accede cun código de aula desde un ordenador ou dispositivo e o mestre pode controlar a lección de todos os dispositivos que están "dentro", inclúe a posibilidade de actividades coma o "quizz"(poderemos compartir resultados ou ocultalos) ou "Draw it" que crea unha especie de pizarra en cada dispositivo ideal para a resolución de preguntas abertas, problemas, respostas en debuxo, escritas, con fotos insertadas, etc. e o mestre/a recibe as respostas. (Bastante similar é outra aplicación chamada Socrative)


Kahoot: Máis sinxela que Nearpod e Socrative é un sistema de resposta basado no xogo, permite crear actividades e preguntas que se desenvolvan coma distintos xogos (de velocidade, respostas de equipo...)



Edpuzzle: é certo que aínda non esta dispoñible a versión docente da app (só web) pero merece a mención, edpuzzle e unha aplicación para dispositivos móbiles e tamen web na cal podemos empregar calquera vídeo existente ou subido por nós, cortalo, incluírlle outro audio ou comentarios e, o máis significativo, incrustarlle preguntas abertas, con ou sen feedback inmediato, preguntas tipo test e comentarios. Así poderemos compartir ese vídeo coa aula na propia aplicación e os alumnos/as poderán dar as súas respostas que recibiremos.


Ata aquí a entrada con 10 aplicacións que merecen unha ollada, hai moitas máis como ben sabedes mais procurei facer unha selección entre as miñas favoritas e de máis uso e outras que poden ser menos coñecidas procurando que atopedes algunha novidade e tamén tendo en conta aquelas que non precisan moitos (ou ningún!) dispositivos.

Agardo que algo vos sexa de utilidade e tamén que teñades moi boa volta aos centros,  moi pronto novos proxectos e materiais. Feliz volta ao cole!

Saúdos desde a fiestra. 



Publicado por en 5 comentarios:
Etiquetas: , , , , , , ,

22/12/2016

Axenda docente do 2º trimestre

Remata o trimestre que parece que pasou voando... hai un montón de recursos e ideas preparados para ser compartidos en breve mais, polo de agora,  aquí ven a axenda do segundo trimestre!

Como comentei NESTA entrada, despois de cursos nos que empreguei opcións só dixitais con Apps como as que recomendaba (iDoceo, Additio, Cuaderno del profesor, etc.) e outros nos que empregaba cuadernos docentes en formato físico este curso optei por unha opción combinada.
Para calificacións, grupos, etc. estou empregando iDoceo, pola contra emprego unha axenda física para anotacións, programación de actividades de aula...


Como para min é importante non cargar con enormes axendas que acumular traballo de todo o curso optei por facer unhas trimestrais o máis lixeiras posible.

Así que, igual que fixen ao comezo do curso aquí tedes para imprimir a miña opción do segundo trimestre, que continúa coa mesma liña do primeiro.



Esta axendiña está lista para descargar e imprimir a doble cara ou adaptar ás nosas necesidades e inclúe:
  • A portada e o estampado traseiro da mesma.
  • A folla dos datos (non vaia ser que a perdamos!)
  • O calendario escolar (segue sendo o da Coordinadora Galega de Equipos de Normalización Lingüística)
  • O espazo para os horarios
  • As follas de organización semanal con calendario trismestral e o espazo para cada día da semana (luns a venres) así como espazo para anotacións e recordatorios.
  • A portada para incluír as follas de anotacións e proxectos ao final da axenda.



Sei que moitos remataremos o segundo trimestre bastante antes da chegada das vacacións de pascua (por equilibrar a duración dos tres trimestres) pero aínda así incluín ata a metade do mes de abril para poder adaptala ás necesidades de cada centro e profe.

Para min está sendo bastante operativa e valoro moito que quede algo bastante manexable e de pouco peso xa que con esto e a App teño todo listo.

Agardo que vos sexa de utilidade, se queredes a miña opinión sobre as distintas apps de xestión docente que coñezo recoméndovos pasar pola entrada de organización do curso na que falei delas desde a miña experiencia.

Saúdos desde a fiestra!
Publicado por en Ningún comentario:
Etiquetas: , , , , , , , , , , , , , , ,

04/10/2016

15 propostas de expresión oral e escritura creativa!

Este curso estamos devorando propostas de escritura creativa e expresión oral a velocidade de vertixe! Así que non queda outra que ir engadindo as novas propostas!



Funcionan, motivan, son divertidas e creativas e fannos mellorar tanto a expresión oral coma a escrita de xeito moi notable, de verdade que recomendo moito que as probedes en moitos niveis porque é moi sorprendente.

Antes de nada déixovos a primeira entrada deste tipo que fixen, na que xa había 20 propostas e ideas de como usalas. Comentarvos que tamén están dando boísimos resultados empregándoas como recurso para o desenvolvemento da expresión oral, non imaxinades os argumentos tan convincentes que dan os rapaces de primeiro para nos convencer de que cada un deles merece "o último pedazo de pizza do mundo" :)

Tamén achego a ligazón á segunda remesa de propostas.
(Podedes descargalas todas!)

E aquí chegan 15 novas...




Agardo que vos gusten, se non as tedes probado vos animedes e non dubidedes en achegar comentarios e opinións!

Saúdos desde a fiestra!
Publicado por en Ningún comentario:
Etiquetas: , , , , , , , , , , , , , ,

18/08/2016

Organizando o curso: axenda docente e apps.

A pouco de comezar un novo curso escolar pareceume boa idea traervos os materiais esenciais cos que organizo os meus días.

Xa vai uns anos que optaba por ter todo (ou case todo) dixitalizado, para o cal empregaba unha tablet, mais, a gran cantidade de grupos e alumnos/as aos que din clase o ano pasado fixéronme ter que engadir, de novo, parte de soporte en papel e, este curso, optarei por unha opción combinada, sinxela e, sobre todo, lixeira. 

A mistura da que vos falo consiste, no meu caso, en empregar as aplicacións de xestión docente da que vos falo un pouco máís abaixo para todo tipo de calificacións e rexistros do alumnado coma viña facendo e empregar unha axenda trimestral en papel que elaborei para a planificacion de distintas actividades ou proxectos de aula ou para anotar todo o que considero que debe estar máis á man ou é máis útil aí que no dispositivo.

A axenda en papel que podedes descargar e imprimir é moi sixela, consta só catro elementos diferenciados:
- Unha portada.
- A folla dos datos persoais.
- Unhas plantillas para incluír os horarios que precisemos (persoais, de grupo, de aulas, biblioteca...)
- Un calendario escolar (neste caso o que teñen colgado na web da Coordinadora Galega de Equipos de Normalización Lingüística)
- As follas de planificación semanal que constituirán o groso da axenda; cun pequeno calendario na parte superior e moito espacio en cada día para completar todo o necesario en cada sesión ou periodo, etc.
- Unha portada interior de anotacións que da paso a algúns folios en branco (ou ben papel pautado ou de cores) para anotacións varias.

Incluín tamén dous separadores que se poden eliminar mais están coa fin de que se imprimimos todo o documento a doble cara quede cada páxina no seu lugar  e vexamos a semana completa ao abrir o caderno.

Esta axenda comprende desde  o inicio de Setembro ata finais de Decembro e, en Xaneiro, comezarei unha similar coa fin de que sexan funcionais e lixeiras. 
Sobre as aplicacións de xestion docente; por si vos sirve de referencia, os anos nos que traballaba só cunha tablet con sistema operativo Android probei diversas Apps como a de Additio pero sen dúbida a miña favorita naquel tempo foi "Cuaderno del Profesor" (ten versión Lite, gratuita e outra de pago) intuitiva moi, moi simple e super eficiente, mais seguro que agora hai outras moitas opcións máis completas. (Tamén empregaba ferramentas de Google para completar a dixitalización de todo o necesario, desde as reunións, programacións de aula, recordatorios...)

Agora, levo dous cursos completos nos que o que emprego é un iPad e, para o seu sistema operativo, a oferta de Apps de xestión docente é enorme. Tras probar e indagar, comecei a usar iDoceo, unha aplicación con miles de usuarios, e, sen dúbida, é a que maís me gusta e a que mellor se adapta no meu caso.

Pode resultar confusa ao principio xa que non é tan intuitiva coma os outros exemplos mais esto é o que permite que sexa moi personalizable e adaptable á situación de cada docente. Podes crear e descargar moitos tipos de plantillas para notas de toda índole, combinalas, modificalas, engadir as célebres rúbricas, etc. En definitva, é unha aplicación coa que, se lle adicas un pouco de esforzo ao comezar o curso, aforrarás moito tempo durante o resto de meses e terás todo organizado e sinxelo para xestionar; un gusto.

Ademáis, nestas aplicacións tamén temos outras moitas funcionalidades que podemos explorar: diario, apartado para todo tipo de datos do alumnado, xestión de faltas, exportación de datos a documentos ou para imprimir, planos da aula para organizar mesas ou recunchos... de xeito que cada un acabaremos por empregar aquelas que nos axudan ou facilitan máis a nosa labor concreta nos centros.

 En resumidas contas, coa axenda impresa e a apliación iDoceo é como eu comezarei a organizar o novo curso escolar aída que é un aspecto que vou adaptando ás necesidades de cada ano así que engadirei novos aspectos e materiais en futuras entradas.

Agardo que cheguedes coas pilas moi cargadas e con moitas ideas para o novo curso!
Saúdos desde a fiestra!




Publicado por en 2 comentarios:
Etiquetas: , , , , , , , , , , , , , , ,
Subscribirse a: Publicacións (Atom)