28/03/2016

Tarefa: A voz dos refuxiados.

Chega o terceiro trimesre do curso e comezamos cun novo recurso co que pretendemos achegar información sobre a crise dos refuxiados aos nosos alumnos/as cunha actividade colaborativa, reflexiva e tamén creativa.

Está plantexada para a área de Educación Musical debido ao producto final que imos elaborar máis é evidente que o tema tratado é necesariamente extensible a diversas áreas. Tamén esta orientada a niveis de 5º ou 6º xa que ten fases que requiren certo nivel de autonomía na aprendizaxe máis todo dependerá das características dos vosos grupos.

(Podes facer clic na imaxe para acceder á web da tarefa!)

Unha vez máis temos a tarefa organizada nunha web e comezamos por botar unha ollada a que sabemos de inicio sobre o tema. Para esto, a parte de mostrar as nosas ideas elaboramos unha nube de palabras colaborativa cunha ferramenta como Answergarden (permite facer nubes cooperativas de xeito moi sinxelo).

Nunha segunda fase recopilaremos información veraz, interesante e comprensible e agruparémola en tres apartados: Historia e sociedade (infografías, artigos, documentais...), ONGs (recopilamos información e ligazóns sobre como actúan certas ONGs con respecto a este tema) e en terceiro lugar: artes (recopilamos distintas manifestacións artísticas relativas ao tema; cartaces, murais, fotos, cancións, viñetas...).
Así despois poderemos analizar as nosas tres seccións e facer un coloquio sobre o tema no cal podemos incluír o visionado dalgún video, as nosas impresións sobre algún dos artigos visitados e incluso solicitar a elaboración unha entrada de blogue que resuma e ilustre cada apartado. 

Coa fin de comparar visualmente a diferenza entre o que sabíamos antes e despois de recopilar e visitar a información elaboraremos unha nova nube de paralabras colaborativa para analizar que novas palabras aparecen e en que grado esta nube reflicte os nosos novos coñecementos e impresións.


A fase final é a máis creativa e na que elaboraremos o noso producto, escolleremos unha base musical (a web oferta dúas opcións) e en gran grupo escribiremos o retrouso atendendo á rima, á metrica e por suposto á mensaxe que imos enviar, despois, en pequenos grupos escribirán a letra das estrofas que faltan e finalizaremos o proceso creativo. Logo só falta pulir, ensaiar e compartir o noso xeito de alzar a voz polos refuxiados na radio escolar, en actuacións, nas redes... 

Cómpre destacar que a web tamén inclúe unha sinxela rúbrica que servirá de guía para a avaliación do desenrolo de toda a actividade.

Así, este recurso pode constituir un xeito motivador, creativo e sinxelo de achegar información e desenvolver un pensamento crítico, reflexivo e razoado a redor da crise dos refuxiados, drama  que non ten por que ser alleo á escola.


Anímovos a que o empreguedes e modifiquedes para adpatalo ás vosas necesidades así como a que acheguedes tanto resultados como as vosas ideas sobre se tratades e como tratades temas coma este nas vosas aulas.


Saúdos desde a fiestra e feliz comezo de trimestre para todos e todas!


13/03/2016

Ciencias sociais: O censo do cole.

Un dos temas recurrentes na área de Ciencias Sociais é a demografía. Onde se adoitan traballar temas como o crecemento poboacional, as taxas de natalidade ou mortandade, censos, etc.


O tema adoita ser árduo, con historia da demografía, fórmulas, e técnicas para facer e interpretar pirámides de poboación que fan que a maioría do alumnado vexa a unidade moi lonxe do seu día a día e interese en xeral.

Así que, en relación a este tema propuxemos aos alumnos traballar con a seguinte tarefa:
De novo a través dunha web que o organiza dividimos ao grupo en 5 equipos dos cales 4 serán censistas e 1 será analista.

Neste caso os analistas vanse centrar na poboación de Arteixo xa que é a cercana ao seu centro máis poderíamos variala. Comezarán por estimar certos datos para logo procurar os datos reais tanto nas ligazóns que lles proporcionamos como empregando outras fontes (escribindo ao departamento de estatística do concello, en prensa, etc.) Elaborarán o cartaz coas diferenzas entre a estimación e os datos reais e planificarán unha exposición oral do seu traballo.

Os grupos de censistas estimarán primeiro o número de alumnos e alumnas que forman o grupo do centro que deberán analizar así coma os porcentaxes deles que fan algún deporte ou tocan algún instrumento musical (igual que os censos poden recoller datos socioeconómicos, laborales, de nivel de formación etc.) Para despois elaborar as enquisas e cartas que pasarán aos titores/as dos grupos para recoller a información.
Finalmente recopilarán a información recollida para facer o cartaz no que expliquen as diferencias entre o censo estimado e o censo real do seu grupo de estudo e prepararán a presentación oral do seu traballo.

A web inclúe unha sinxela rúbrica de avaliación e os alumnos/as tamén poderán empregar unha lámina para avaliar as presentacións dos seus compañeiros así como completarán en cada sesión unha plantilla de autoavaliación do grupo con respecto ás normas de traballo en equipo.

(Fai clic na imaxe para acceder á web!)

Saúdos!

06/03/2016

Como facer unha boa presentación.

Os alumnos e alumnas realizan a miúdo presentacións orais nas nosas aulas e nelas poden apoiarse en materiais coma presentacións (xeralmente dixitais) mais o certo é que, chegar a facer unha boa presentación que apoie o seu discurso non é doado, sobretodo porque é algo que poucas veces se explica (e que moita xente pasa por alto).

Cantas veces estamos presentes en charlas (de alumnos/as ou de outros adultos) nas que as presentacións teñen transicións tan esaxeradas que comezamos a prestar máis atención a cal será a seguinte que ao discurso do/a poñente? Cantas veces estivemos nese momento no que aquel que presenta algo le palabra por palabra os textos das diapositivas coa pesadez que conleva?

Xa vai un tempo que decidín empregar o material que aquí vos deixo antes de solicitar ao alumnado que faga unha presentación e eles mesmos/as aprecian a enorme diferencia entre as presentacións que elaboraron outras veces e as que fan despois de reflexionar un pouco sobre como estas funcionarán mellor diante do seu público.

A presentación que achego inclúe pequenos consellos con varias exemplificacións e eu adoito empregala esaxerando un pouco cada un dos aspectos que recolle, por exemplo lendo cun tono anodino e rápido a diapositiva que está chea de texto.


Ter unha boa presentación de apoio fará que os oíntes reteñan con máis facilidade os datos que nos desexemos, que presten máis ou menos atención a certos aspectos e tamén pode axudarnos a manter o fío do discurso, a non esquecer contidos relevantes, etc. así que podemos concluír que o realmente importante de incluír presentacións dixitais (ppt, prezi...) nas intervencións orais do alumnado de primaria será sobretodo aprender a facer presentacións de crecente calidade.



Saúdos!