Hoxe que saco un anaco de tempo ao tempo vou deixar aquí unha parte do material de inverno...
Hai dous imprimibles de cartas para xogar.
Un é un tabú temático de inverno/nadal. Un xogo que sempre resulta no fomento da expresión oral, incremento de vocabulario e do que se poden facer moitas variantes na aula. En resumo, que para min é de utilidade e por iso está aí.
O outro xogo de cartas é unha versión do xogo "Taco, gato, cabra, queso, pizza". Este é un xogo que moitos nenos e nenas xa coñecen; de mecánica sinxela e rápida e tamén divertido, por iso decidín facer unha versión para aulas e biblio coa que asentar uso da lingua noutros contextos e tamén o traballo que realizamos arredor do inverno e nadal aquí. Neste caso, no canto de "Taco, gato, cabra, queso, pizza" empregamos "saco, rato, masa, zoca, piña" e as cartas especiais son "trubinco", "tizón" e "zambomba". Un éxito.
Deixo tamén un lote de imprimibles básicos, están marcados con niveis do 1 ao 4. E outro lote con plastificables sinxelos (retos de lego, de policubos, tres en liña, busca e conta, puzzles...) Ademáis dun mapa para Beebot que xa empregamos outro ano.
Por último hai un pequeno xogo de probas feito en Genially que xira en torno ao nadal, o Apalpador e os trubincos.
AQUÍ podes descargar unha única páxina en PDF interactivo de xeito que fas clic en cada elemento e xa vas directamente á descarga ou acceso.
Ah, e tamén este pequeno almanaque ata as vacacións...
Volven quedar cousiñas pero se algo disto vos é de utilidade para as aulas... pois aí queda, con agarimo.
Vai rematando o curso e aínda que deixei moito no tinteiro veño deixar aquí un dos éxitos do recreo.
Sabedes xogar ao xogo de cartas Virus!?, pois nós fixemos unha versión que se chama Foliada!
(Podes facer clic na imaxe para descargar o xogo de cartas!)
Como funciona?
No canto de órganos tes que conseguir elementos para a Foliada! (pandeiretas, baile, comida, xente ou a propia foliada (comodín), poden suceder enredos (virus) coma a pandeireta rachada, a escordadura de nocello, a comida queimada, chuvia ou a foliada cancelada (enredo-comodín).
Ademáis podemos solucionar os enredos con axudiñas: cantareira, sacapuntos, bochinche, carpa da comisión, ou aturuxo (axudiña-comodín)
E temos as cartas especiais: Cacique (rouba elementos da foliada), figa (envía enredos da túa foliada a outras), trasno (cambia un elemento da folida por outro), aire de morto (fai que todos os demáis se descarten das cartas da súa man), polavila (intercambiar foliadas).
Non é máis ca unha versión dun xogo que moitos e moitas coñecen pero é un placer ver como xogan! Ao final, xogos coma o Virus! ou Foliada! combinan estratexia, atención, toma de decisións... nun contexto divertido; e velos/as planificando, anticipando accións, xestionando, interactuando, razoando e co engadido do valor cultural e identidade... pois da gusto!
Así que se o queredes, se vos é de utilidade ou interese para a escola ou para a vida pois CLIC descargar, imprimir e xogar! (O documento está feito para imprimir a dobre cara e recortar e inclúe a páxina de instruccións!)
Sen máis, agardo ter momentos para deixar por aquí algunhas outras cousas pendentes por se a alguén lle valen... pero ás veces apílase a vida! :)
Non vou estender moito as explicacións; fixen de novo a miña axenda (a que uso, sen artificio vaia... en varios formatos) e ademáis, desta volta engado un pequeno caderno interactivo que empreguei o ano pasado (fixérao rápidamente e non chegara a subilo).
Eu só emprego esto: a axenda impresa e o caderno dixital xunto co mil veces mentado iDoceo onde gardo as cualificacións e esas cousas...
A miña axenda impresa é en formato vertical pero como teño unhas compañeiras moi afeitas á horizontal... volvinlla facer con agarimo tamén en apaisado.
Ademáis, fixen de novo o documento da axenda en interactivo para empregar nos dispositivos quen así o desexe. Deixo o formato .pdf interactivo coas lapelas laterais e superiores (tamén son interactivos os días de cada calendario mensual) e tamén o formato GoodNotes.
Como dixen, o curso pasado fixen para min un pequeno caderno interactivo que non ten nada máis que apartados separados (claustros, equipos, ideas, calendarios...) e follas punteadas que se van insertando; é, coma quen di, un caderno de anotacións dixital un pouco depurado pero é que eu non me adapto moito cos formatos ríxidos que teñen espazo para data, para orde do día... porque, por exemplo, esto último adoito pegalo en imaxe, engado ligazóns... non sei. O caso é que como o volvín facer queda aí tamén por se a alguén lle é de utilidade (tamén deixo o que serían as portadas e follas normais por se alguén as quere imprimir, combinar, o que sexa...)
Así que; se a alguén lle son de utilidade quedan AQUÍ (ou facendo clic na imaxe) todos os arquivos distintos listos para descargar e imprimir (ou empregar directamente no caso das interactivas).
Sen máis, agardo que esteades a desfrutar un bo agosto e que collades folgos e ilusións para setembro. 💙
17 de abril, un mes exacto para o Día das Letras Galegas e...
O certo é que este curso cruzou a miña mente a idea non facer sala de fuga ou como moito algunha pequena sobre algo moi concreto pero... para cando me quixen decatar xa estaba ata as cellas de información e ideas sobre a autora homenaxeada nestas Letras Galegas e é que entrar no universo Villalta pode non semellar doado para todo o mundo pero unha vez que estás dentro... é tremendamente cautivante.
De feito, non é que non fixera sala de fuga, é que preparei tanto a sala "física" ou "analóxica" ou non sei como chamarlle e tamén a sala de fuga dixital e algún pequeno material imprimible máis que podes descargar tamén.
Comezarei por intentar explicar un pouco as salas de fuga e, ese e o outro material, está todo para descargar baixo as liñas de texto!
Como explicaba, vinme ateigada de información, xa tiña varios libros antigos de Luísa Villalta e de súpeto engadín un montón de textos, libros novos, xornais, publicacións colectivas artigos... e tratar de reducir e simplificar (moito) información non é sempre o máis sinxelo de facer pero coido que quedou unha sala de fuga que da información relevante sen chegar a saturar demasiado, procurando ser unha porta para que, quen queira, siga explorando despois (porque é fascinante!).
Tanto nunha como noutra as "investigacións" e retos poden ser acometidos en calquera orde xa que con eles iranse conseguindo diferentes números e cores que, combinados, abren un cadeado e recompensa final.
Intentarei simplificar a explicación das salas, digamos que, por distintos camiños, podes chegar a explorar 4 puntos esenciais: Un esta composto de aspectos básicos da biografía de Luísa Villalta, outro da súa vertente vencellada a música, un terceiro sobre a bibliografía e outro máis sobre sociedade e activismo.
Explorando textos, imaxes, audios... resolvense retos de dificultade media que van aportando as cifras e cores que precisamos para desbloquear o cadeado final.
(este é un esquema da sala de fuga "analóxica")
Na sala de fuga dixital todo isto acontece mentres navegamos libremente por distintos escenarios (un mapa da Coruña no que ir a distintos puntos de interese, un estudo ficticio da autora no que ir picando en distintos elementos, unha rúa da cidade, o conservatorio de música, etc.) na maioría de escenarios os botóns están ocultos así que haberá que ir probando, investigando e deducindo ata atopar e resolver os retos. (Podes acceder á sala de fuga dixital AQUÍ ou máis abaixo)
Por outra banda, na sala de fuga "analóxica" o escenario constrúese (no meu caso na biblioteca do centro) emprego libros da autora, tamén algunha da publicacións deste ano relacionadas con ela, recortes, uns botóns, etc. a mecánica é semellante, poden investigar polo espazo e resolver os retos como vaian atopando ou desexen ata ter os números e cores precisos (eu prepareina para realizar en pequenos equipos, non todos á vez)
Non é nada doado intentar explicar así a sala "analóxica" pero fixen un .pdf cos materiais básicos engadindo un mínimo de explicación sobre como preparala, non sei se pode ser comprensible pero se a alguén lle é de utilidade pode descargalo.
Cartaz colaborativo: Fixen un cartaz conmemorativo todo formado por cadriños que se pintan seguindo un código para formar a imaxe final. Se o queres empregar só tes que descargar, imprimir, repartir, colorear seguindo o código e montar. (Eu emprégoo na sala de fuga, cada equipo ten no seu cofre final algunhas das pezas e cando pasan todos os equipos montamos o cartaz)
Así que se alguén lle é de utilidade ou algo pois aquí queda todo o que puiden e eu feliz.
Non me despido sen antes decir que tanto na Web da sala de fuga dixital coma no material da "analóxica" hai un apartado (ou unha páxina) de fontes, cun montón de referencias, webs, publicacións, .pdfs, guías didácticas, vídeos, tamén os libros físicos que máis usei... etc. Seguramente deixei algunhas cousas pero moitos dos recursos que empreguei máis a cotío no traballo ou que me pareceron máis interesantes están aí e poden ser de utilidade, por se queredes botar un ollo.
Puf, isto si que é "moito texto" e non o que din por aí, semella imposible que alguén chegue a ler ata esta liña pero se é así grazas polo interese e saúdos desde a fiestra! <3
Boas, a verdade é que últimamente non estou subindo aquí as cousas... este blogue comezou coma un xeito de gardar experiencias, organizar os materiais... e, de paso, partillalos por se alguén lle eran de utilidade e é o que pretende continuar a ser... os ritmos dependen de moitas cousas, do meu tempo, da voráxine da escola mesmo das propias ganas, sen máis.
Hai varias cousas pendentes pero non quería deixar máis tempo sen partillar esto.
Estiven un tempo consultado e dando voltas arredor das Sensombreiro, e rematei por crear varias cousas.
Unha sala de fuga dixital: Esta sala comeza coa escolla dun dos 4 personaxes que a protagonizan; na aula eu dividin ao grupo en 4 equipos de xeito que cada equipo fixo a sala dun personaxe e na derradeira proba tiveron que xuntar un código de cada equipo para chegar ao logro final, (deixei tamén un apartado por se algúen traballa individualmente e non vai facer as castro misións para que poida acceder ao final por outra vía).
A sala é unha aventura na que ir descubrindo tempos, personaxes, obras e accións das Sensombreiro; mulleres artistas de distintos eidos que compartiros espazos, debates, tarefas e logros con todos os autores de renome da Xeración do 27 (Lorca, Alberti, Dalí...) pero cuxas vidas e obras quedaron sistemáticamente invisibilizadas. A sala de fuga está creada en web (uso preferible en ordenador) e debe empregarse con auriculares ou dispositivo de audio xa que hai moitas pistas, cavilacións, vídeos... para os que se precisa escoitar.
A sala é asequible aínda que esixe, coma calquera sala de fuga, poñer a traballar un pouco o miolo e buscar, probar, inferir, decidir... e procurei non deixar de lado o uso de material real e variado, ou anécdotas e imaxes da época á vez contextualizar, presentar historias e datos que non son, a priori, coñecidos polo meu alumnado.
Uns pequenos xogos de lóxica con tres niveis diferentes, estos xogos están compostos dunhas pistas ou afirmacións e unha grella na que ir marcando para descubrir nomes, profesións e obras dalgunhas das Sensombreiro, teñen unha versión dixital AQUÍ na que cun clic na cela esta se pon en verde, con dous clics márcase en vermello e se picas unha terceira vez borrarase a marca da cela (mais tamén fixen a versión imprimible que vai no documento completo)
Para o traballo sobre o contexto das Sensombreiro e a súa historia fixen tamén un material imprimible ao igual que preparei algunhas biografías descargables para empregar. Xuntei tamén unha sorte de propostas de traballo sobre as Sensombreiro que inclúo no documento así coma os citados xogos de lóxica de pistas e grella.
Todos estos materiais adicionais poden descargarse nun pdf completo NESTA LIGAZÓN.
Así que aquí quedan por se son de utilidade ou interese para alguén, agardo que esteades a ter un bo curso.
Chegou agosto, mes vacacional pero por se a alguén no lle para a cabeza ou sinte gozo co de ter as cousas novas... xa chega a axenda 2022-2023 desta volta con algunha pequena novidade...
Como sabedes a axenda que emprego eu é moi sinxela, non é máis que un... programador poderíamos decir, e aquí está o deste ano por se a alguén lle é de utilidade.
Desta volta temos unha axenda imprimible en dous formatos distintos, por unha banda a axenda en vertical (eu imprimo en A4 a doble cara) e polo outro lado un formato máis compacto (a do ano pasado adapteina a ese formato para unha compañeira así que desta volta fixen unha réplica directamente), este formato máis pequeno é tamén en A4 mais en horizontal ou apaisado de xeito que cada semana está enteira nunha páxina (arquivo pensado para imprimir tamén directamente a doble cara) e a verdade é que quedou bastante feitiña.
Ademáis tiña bastante curiosidade por saber se podía facer unha cousa máis... Eu son moi de papel para isto (non así para avaliación, notas, rúbricas, etc.) pero de tanto ver traballar con editores coma GoodNotes nos iPads e así quixen saber se eu era capaz de adaptar a axenda a ese formato e facela interactiva e...aló foi!
Así, hai unha terceira versión da axenda tanto en formato GoodNotes coma Pdf interactivo para empregar noutros editores e nesta versión incluín unhas lapelas nas que, ao facer clic, imos directamente aos distintos trimestres, meses, calendarios ou horarios e tamén, ao facer clic en calquera día dun calendario mensual iremos á páxina da axenda que ten ese día... trasteando pareceume moi cómodo (hai que lembrar que para navegar temos que saír do modo edición que si empregamos para escribir nela, claro), por suposto hai mil interaccións máis que se poderían incluír pero para comezar... creo que quedou xeitosa por se hai alguén por aí a quen lle poida servir a miña curiosidade quedou saciada tamén...
Se accededes á web para descarga de arquivos veredes que tamén deixei uns arquivos cos calendarios separados (en vertical e horizontal) e tamén as follas adicionais que empreguei algún ano, listaxes, folla de aniversarios, separadores...
Desistín de empregar o Slideshare para partillar os arquivos xa que cambiou moito desde os inicios e da bastantes problemas mais, se a alguén os quere é tan sinxelo coma acceder á web desde as imaxes e ligazóns ou AQUÍ e facer clic nos arquivos que vos sexan de utilidade ou interese.
Xa estamos aquí, a piques de entrar en agosto, e chega a axenda docente...
Lembro que o curso pasado escribía sobre que facer a axenda era un xeito de atopar áncora nun curso que se viña plagado de incertezas porque... vaia marexadas levamos desde aquel 13 de marzo, a verdade.
Semella que á "normalidade" aínda lle vai faltar un pouco para chegar ás escolas e imos ter que seguir navegando entre ondas e remuíños (se cadra sempre o fixemos) así que haberá que agarrar os aparellos e botarse ao mar.
Deste xeito chega a miña nova axenda, sendo áncora e faro para min... como sabedes doutros anos é unha axenda/planificador moooi sinxela, mais é o que teño comprobado que funciona para min... (se buscades por "axenda" tedes algunhas entradas sobre como me fun organizando varios anos)
A axenda ten as capas, folla de datos, calendario escolar e parte para os horarios e despois follas para dividir os trimestres (poderíades movelas de sitio se fora preciso) un calendario de cada mes ao principio do mesmo con algunhas datas sinaladas e as follas da programación (semana vista)na que tamén se sinalan algunhas datas de interese. É dicir, o formato xeral é coma o dos outros anos e tamén repito o de incluír uns sutís puntiños de fondo que sirven de guía na escritura xa que estiven cómoda con eles...
Persoalmente imprimo en A4 (a dobre cara), o arquivo está listo para imprimir así sen máis (ou mandar a imprimir) e xa se podería encadernar (eu teño un caderno Filofax reutilizable de hai uns anos e é o que estou empregando pero é igual que encanutillar).
Ademáis, deixo un arquivo máis que contén: dous modelos de follas de táboa (tipo avaliación/faltas/retos...), un modelo de folla para os aniversarios e portadas simples doutras seccións/cadernos (claustros, cursos, ideas, reunións con familias, biblio...)
Non é unha axenda moi extensa nin con moita historia pero é o que me funciona a min (de feito eu imprimo por trimestres...) pero se a alguén lle é de utilidade aquí está para que a poidades descargar, podedes facelo no arquivo deslizable de arriba mais deixo tres ligazóns alternativas e xa sabedes que podedes contactarme (aquí, no instagram ou onde sexa) e non teño problema en mandala por mail:
(Teño a sensación de que slideshare está reducindo moito a calidade do arquivo, polo menos eu véxoo peor aí así que recomendo calquera das outras alternativas, se cadra a web da "descarga directa" é o máis sinxelo...)
Sen máis, aquí quedan os arquivos por se a alguén lle son de utilidade, imprimir e listo!
Agardo que esteades ben e tendo un bo verán e que collades moitos folgos para o vindeiro curso e mándovos tamén...
A fiestra semella un pouco lenta este curso, decateime agora de que non organicei aquí nada do que fun facendo desde Samaín... este curso é un pouco distinto para todos/as, non é?
Persoalmente, cambiei de centro o que xa implica, para min, gran dedicación para ir coñecendo ao alumnado, dinámicas, etc. ademáis caín nunha responsabilidade inesperada, temporal pero absorvente na que tamén hai moito que aprender... e despois, claro, está o "pequeno tema" da pandemia mundial pero... que vos vou contar; sempre adiante!
O caso é que non andiven moi hábil para ir subindo aquí as cousas e acabo con mil historias desorganizadas e acumuladas pero en fin... (aínda que se vos interesa, procuro ir subindo algunhas das cousas no Instagram, nas historias ou así, que sempre é máis áxil, con intención de que despois rematen aquí máis ordenadas e accesibles (para min, pero tamén para quen queira e lle sirvan!)
Ao que imos. Xa que se achega a data comezo por partillar unha imaxe interactiva de acceso a algúns recursos co gallo do Día da Muller e da Nena na Ciencia (11 de febreiro).
Fixen un pequeno documento con algunhas tarefas que desenvolvín outras veces e outras, por exemplo; unha guía para que o alumnado procure información e cree os discursos dos premios que deberían terse outorgado a distintas mulleres afectadas polo efecto Matilda, a lista de cotexto que empreguei para que un "equipo de sección" de radio creara a sección "Efecto Matilda", tamén para elaborar un rosco tipo Pasapalabra ou as follas que lle faltan ao noso temario.
Ademáis inclúo algúns recursos que me gustan moito como:
"El diario secreto de Henrietta Leavitt"(CSIC), son uns capítulos en video de arredor de 5 minutos cada un nos que a propia astrónoma vainos contando aspectos da súa vida e traballo coma se víramos o transcorrer do seu diario en formato videoblogue.
As "Cápsulas de Son" (RadioVoz) nas que en audios duns 2 minutos e cunha linguaxe sinxela e adaptada explican biografías e logros de distintas mulleres das ciencias
Astrochat (Sara Gil e Fernando Liébana): Un xogo que xa recomendei un montón de veces no que conversar cun espelido robot e descubrir un montón de mulleres da astronomía nas distintas misións.
No apartado dos documentos puxen só 4 dos moitos que agora proliferan porque foron de utilidade noutras ocasións ou para as tarefas que explicaba ao comezo: Unha liña do tempo con 11 mulleres que contribuíron de xeito especial a que comprendamos a ecoloxía terrestre e a evolución (CREAF), unha infografía sobre algúns dos inventos creados por mulleres (Iberdrola), unha recopilación de 18 mulleres científicas afectadas polo Efecto Matilda (AMIT e Mulleres con Ciencia) e un caderno para colorear (Secretaría Técnica do Ministerio de Ciencia Innovación e Universidade)
Agardo que esteades a ter o mellor curso posible, mando moito ánimo e xa sabedes, se queredes ir un pouco máis ao día con algunhas cousas que vou subindo podedes botar un ollo ao instagram, mentres, eu procuro seguir organizando cousas por aquí.
Sen dúbida achégase o curso máis confuso ao que me enfrontei nunca (e mira que ao que rematou chegoulle!); a crise da Covid19 veu para remexelo todo a todos os niveis e a incertidume é inmensa, por máis "protocolos" que publican, as inquedanzas permanecen e sinto que imos cara unha marusía que non sei como navegaremos só que procuraremos non afundir mentres loitamos nas ondas por ter un ensino de calidade e seguro para todos/as.
No medio desta marexada eu tamén procuro áncoras; non podo evitar pensar, programar, "argallar" aínda que as múltiples variables que andan en xogo deixen todo con centos de fíos soltos (se se pode así, ou quizás mellor facelo deste outro xeito, ou se non...) e unha das áncoras foi facer a miña axenda deste curso, non está claro o que levará dentro pero o curso sucederá así que aferreime a unha das poucas certidumes (supoño).
Como sabedes doutros anos a miña axenda é moooi simple porque ao final, é o que uso eu, non son de levar grandes libros de avaliacións e demáis e incluso imprimo por trimestres... (tedes máis info sobre como me organizo nas entradas doutros anos).
Neste caso ten as capas, folla de datos, calendario escolar, horarios (algunha folla extra), portadas para cada trimestre e, diante de cada mes o calendario mensual (ademáis das follas da planificación de actividades (semana vista), claro) este ano procurei inclúir tamén no planificador e nos calendarios datas sinaladas (semana da prensa, día da muller, das Letras, etc.) así como uns sutís puntiños coma fondo de páxina que sirven de guía.
Ademáis tedes aquí outro arquivo con algunhas outras páxinas: portadas para claustros, Consello Escolar, cursos/grupos/PFPP..., a nosa biblio e ideas; tamén a páxina de "Parabéns para tí" e ademáis unhas pequenas fichiñas ou etiquetas para empregar como marcadores: dos meses do curso e de seccións (tamén follas adicionais e unha portada alternativa).
A axenda ten cor pero coido que está tratada dun xeito que se se imprime en escala de grises o resultado non ten porque ser malo, e eu, por exemplo, imprimín as capas (coa portada alternativa) en folios de cor, ben, neste caso nos folios reciclados dos "antigos" esos que tiñan esa tonalidade entre marrón e grisáceo...
Chegará o novo curso e vai facer falta máis que ilusión e profesionalidade,chegará,sen dúbida, entre importantes medidas porque é como ten que ser, ademáis, para min, estas medidas esixen tamén máis investimento e persoal nos centros para minimizar os riscos e á vez procurar unha calidade educativa a todos os niveis; os equipos docentes non somos avaliadores de riscos sanitarios, nin médicos, nin arquitectos, nin... e coido que non podemos asumir tooodo ese tipo de responsabilidades sen axuda, pero isto é outra historia que da para moito... voltaremos ás aulas con ideas e forza, eu devezo porque chegue ese momento e ogallá sexa nunhas condicións seguras para todos/as e con recursos para continuar desenvolvendo experiencias educativas enriquecedoras, diversas, adaptables, participativas, etc. (non podemos dar pasos atrás na calidade...) o escenario non é cómodo e a lectura dos protocolos produce calafríos nalgúns puntos pero, como sexa, a vontade e a ilusión de cada curso están presentes e esas, poden ser outra áncora e outro faro.
Aquí queda a miña axenda,por se é de utilidade para alguén, non hai máis que descargar e imprimir (pódese descargar directamente desde os "slideshares" de arriba (aquí a axenda e aquí as páxinas adicionais) e quedan os arquivos tamén neste cartafol, se hai problemas sabedes que podedes contactar e mándovos os arquivos por mail) mentres, eu sigo procurando áncoras, faros e aparellos cos que navegar o curso que está por vir e mándovos moita sorte e folgos así como agardo tamén que desfrutedes na medida do posible das vacacións porque o certo é que, sen dúbida, van máis que gañadas.
Estamos de volta, ben, case de volta... sabendo que hai a xente á que lle pode ser de utilidade subo a axenda simple deste curso que está a piques de comezar.
Como sabedes, eu levo case toda a organización de calificacións, asistencia, etc. en dixital (emprego iDoceo) mais non deixo de empregar papel á hora de planificar as sesións de xeito que este descargable non é máis iso, un planificador simple, procurando ser o máis lixeiro posible...
O certo é que para este curso que entra, un equipo do cole creamos unha axenda escolar propia, pensada para os nenos e nenas pero... que con tanto traballo e agarimo invertido nela agardo que sexa a que empregue...polo menos en parte; a risco de non adaptarme creei esta co formato doutros anos así que se vos é de utilidade... aquí a tedes!
Coma noutros cursos neste arquivo atoparedes:
Portada
Páxina de datos
Calendario escolar
Horarios
Planificador dos tres trimestres con candasúa portada.
Páxinas de reunións
Notas ao curso que ven
Todo iso listo para que imprimades e empreguedes coma mellor vos conveña (enteiro, por trimestres, con máis follas para reunións ou notas, eliminando partes, etc.)
Agardo que desfrutedes estos días e voltedes tamén con moitos folgos para o curso que entra! Agardo tamén empregar e priorizar mellor o meu tempo este curso e poder así ir organizando e partillando aquí máis cousiñas por se lle son de utilidade a alguén!😅
Non estou desaparecida, ben, un pouco si, pero é que este curso está sendo bastante distinto aos anteriores e parece que non atopo o espazo de tempo necesario para ir subindo todo o que me gustaría gardar neste pequeno arquivo que é o blogue, aos poucos recuperarei o ritmo pois hai moitas cousas que teño ganas de conservar nesta fiestriña.
O caso é que en nada estaremos conmemorando o Día de Rosalía de Castro, o 24 de febreiro, a "nosa escritora máis universal" cuxo relato da súa vida e obra veuse tantas veces alterado, contada, en ocasións, coma chorona, nostálxica chea de saudades e incluso de escritura sinxela e doméstica, esquece este relato engadir a súa preocupación pola condición e sorte das mulleres, presente en toda a súa obra, unha muller tamén transgresora, librepensadora e de profunda escrita.
Ben é certo que xa hai anos que distintos estudos se encargaron de devolver a Rosalía ao sitio que lle pertence así que sempre é posible acudir a eles para completar o relato.
Preocupada pola imaxe que se transmite acerca de esta escritora e acompañada polo proxecto de centro preparei unhas pequenas actividades para o alumnado dos niveis máis altos.
Todas as actividades parten da lectura dalgún texto de Rosalía, ben sexa un poema, un prólogo, un parágrafo dunha obra, etc, e a partir da lectura comezará o debate, a reflexión, as preguntas e, finalmente, todas as propostas incorporan algunha tarefa que precise un certo nivel de implicación e creatividade (crear cartaces, comics, fotogramas...)
Pensadas para traballar tanto en gran grupo coma en equipos, elaboreinas coma un punto de partida distinto ao "adios rios, adios fontes" ou á "negra sombra" que pode derivar en moi diversas perspectivas e enfoques.
Queda aquí o material de libre descarga por si vos é de utilidade e ao que tamén podedes acceder na web xunto con algún que outro recurso recopilado.
Esto está a piques de comezar! Como sei que a moita xente lle pode ser de utilidade subo esta sinxela axenda docente descargable que fixen.
Como podedes ler en entradas doutros anoseu teño case toda a labor de calificacións, anotacións, programación, etc. dixitalizada (emprego principalmente iDoceo, moi útil e completa pero con moitísimo que trastear) así que esta axenda é en esencia un simple planificador xa que procuro que sexa moi lixeiro, de feito, sabedes por outros cursos que adoitei imprimir por trimestres para non levar peso de máis.
Aquí tedes o curso completo:
Portada
Páxina de datos
Calendario escolar
Horarios
Planificador dos tres trimestres con candasúa portada.
Páxinas de reunións
Notas ao curso que ven
Todo iso listo para que imprimades e empreguedes coma mellor vos conveña (enteiro, por trimestres, con máis follas para reunións ou notas, eliminando partes, etc.)
Con folgos e moitas ganas de ir subindo cousas que teño pendientes pecho esta entrada, agardo que todos e todas teñades moi boa entrada no curso, a disfrutar!
Chega agosto e pouco a pouco vai voltando a actividade...
Para ir abrindo boca ao novo curso traio algunhas ideas arredor da novela Wonder, é que tiña xa moitas ganas de falar dela polo blogue.
Wonder é un libro (e unha colección) protagonizada por August Pullman, e o certo é que é moi difícil que, se cae nas mans dun docente, este poida resistirse a levalo ás aulas porque é unha marabilla, é coma se todos/as pensáramos "esto é preciso que o lean os rapaces/zas" e, de feito,o movemento xerado por este libro en aulas de todo o mundo é enorme.
O caso é que Auggie é un rapaz de 5º de primaria, ten 10 anos e o síndrome de Treacher Collins, un trastorno xenético caracterizado por malformacións craneofaciais.
No libro "Wonder, La lección de August" [CAST] é el mesmo quen nos conta as experiencias, sensacións frustracións e superacións que vive cando por fin asiste ao cole e tamén distintos personaxes contan a historia desde o seu propio punto de vista.
Aquí traio un material de libre descarga que preparei, neste caso, para empregar cando todo o grupo le a novela ou nun clube de lectura... e está dividido en 4 partes.
A primeira sección do material son preguntas (abertas e pechadas) sobre cada parte do libro para promover o debate, a comprensión e a reflexión.Pódense ir facendo todas, só algunhas, unhas en conxunto e outras de xeito individual...
A segunda son unhas tarxetas de propostas de escritura breve (un ou dous parágrafos) relativas ao libro e esixen un pouco máis de reflexión e elaboración que as preguntas iniciais.
A terceira parte son unha serie de actividades propostas que abranguen distintos estilos (cómic, crítica literaria, poesía, arte...)
E a cuarta é para a realización dunha tarefa en equipo, neste caso unha campaña fotográfica, inclúe as indicacións, pasos, ficha de idea e boceto do grupo e tamén a rúbrica para que a poidan ter presente en todo o proceso.
Coido que si botades unha ollada ao material entenderedes mellor todo isto.
O certo é que o libro parece perfecto para os rapaces da mesma idade de August pero tamén é moi sinxelo de ler e cada parte está dividida en mini capítulos de apenas unha páxina; xenial para traballar a distintos niveis, en distintos momentos e de distintas formas xa que se adapta desde tempos moi curtos de lectura compartida e traballo a procesos máis longos, así que se aínda non lle botaches unha lectura, anímote a que o fagas.
Por certo, uns apuntes finais; aínda que este material está en galego, de momento, a novela non está traducida e a lectura facémola en castelán e outra cousa interesante é que se fixo unha peli baseada no libro que pode ser un bo recurso para culminar todo o traballo sobre o mesmo! Pouco a pouco volto á fiestra con máis cousiñas, agardo que esteades a disfrutar do verán! Saúdos desde a fiestra!
%20(2).png)
%20docente(s)%20descargables%202023-2024-3.png)
%20DOcENTES%202022-2023%20IMPRIMIBLES%20E%20INTERACTIVA.png)
